AQSh elshisi qymyz ben shubatty kóbirek ishýge keńes beredi
Aıta keteıik, konferentsııa barysynda Aýyl sharýashylyǵy mınıstri Asyljan Mamytbekov arzan sút untaqtaryn paıdalanyp, dúkenderde ony «tabıǵı sút» retinde satatyndardy synǵa alǵan bolatyn. Onyń aıtýynsha, qazir sút ónimderin shyǵaratyn zaýyttarǵa tabıǵı sútti satyp alǵannan góri Reseıden ákelinetin arzan untaqty paıdalanyp, sony tabıǵı sút retinde saýdaǵa shyǵarý tıimdi. «Ókinishke qaraı, bizdiń naryqta tutynýshylardy aldaý basym. Máselen, sút degen ataýǵa laıyq emes taýardyń syrtyna «tabıǵı sút» dep jazyp qoıady», - dedi A. Mamytbekov.
Óz kezeginde AQSh Elshisi Djordj Krol myrza mınıstrdiń sózimen kelise otyryp, ony tolyǵymen qoldaıtynyn aıtyp qaldy. «Shyndyǵynda, Qazaqstanda dúken aralaǵanda qaǵaz sút qoraptarynyń syrtynda, sút paketterinde jazylǵandy oqyp, men shynymen bul tabıǵı sút pe dep kúmándanamyn. Sondyqtan da, men shubat pen qymyzdyń úlken qoldaýshysymyn. Jurt qymyz ben shubat ishsin. Olar aǵzaǵa óte paıdaly», - dedi AQSh elshisi.
Sonymen qatar, Djordj Krol shubat pen qymyzdyń álemdegi azyq-túlik qaýipsizdigine de qosar úlesi zor ekenin atap ótti. «Men jalpy qymyz ben shubatty qoldaımyn», - dedi ol.
