AQSh elshisi koronavırýstan qorǵaný týraly málimdeme jasady

NUR-SULTAN. QazAqparat –Qazaqstandaǵy AQSh elshisi Ýılıam H. Mozer Qazaqstan men AQSh arasyndaǵy koronavırýstyń taralýymen kúres seriktestigin rastaý úshin málimdeme jasady, dep habarlaıdy QazAqparat Qazaqstandaǵy AQSh elshiligine silteme jasap.

«Jaqynda jumys saparymen kelgen AQSh Memlekettik hatshysy Qazaqstannyń jańa koronavırýs – COVID-19-ǵa daıyndyǵyn joǵary baǵalady. Ol Qazaqstan Úkimetiniń vırýstyń taralýyn toqtatý úshin jedel áreket etkenin atap ótti. Sonymen birge, memhatshy álemdegi kóptegen elderdiń koronavırýstyq pandemııaǵa daıyn emestigin atap ótti, sondyqtan Amerıka Qurama Shtattary jahandyq shara qabyldaýǵa 100 mıllıon dollar bólýdi moınyna aldy. AQSh-tyń aýrýlardy baqylaý jáne aldyn alý ortalyqtary (CDC) indettiń aldyn alý úshin jáne vırýs tabylǵan jaǵdaıda ony eńserý úshin Qazaqstan Úkimetimen tyǵyz jáne jemisti jumys isteýde», - delingen málimdemede.

AQSh aýrýlardy baqylaý jáne aldyn alý ortalyqtarynyń aımaqtyq keńsesiniń basshysy doktor Denıel Sınger Qazaqstannyń óz azamattaryn Ýhan qalasynan evakýatsııalaǵan aımaqtaǵy alǵashqy el ekenin atap ótti.

«Sonymen birge, Qazaqstan COVID-19 vırýsynyń aldyn alý jáne el aýmaǵyna taratpaý úshin aýqymdy sharalar qabyldady. Qytaımen shekaradaǵy qozǵalys azaıtyldy jáne qalǵan qozǵalysty sońǵy 25 jylda men kórgen eń jetildirilgen júıe arqyly baqylaýda. Qazaqstan Úkimeti COVID-19 anyqtamasynyń naqty krıterıılerin qabyldady. Úkimet jańa vırýstyń qanshalyqty qaýipti ekenin biledi jáne oǵan qarsy kúreske daıyndyq úshin batyl qadamdar jasady. Bul qadamdar naǵyz kóshbasshylyqty kórsetedi», - dedi Denıel Sınger.