AQSh Elshisi: Qazaqstan álemdik arenada kóshbasshyǵa aınaldy
NUR-SULTAN. QazAqparat - Qazaqstan álemdik arenada kóshbasshyǵa aınaldy. Bul týraly búgin Aqordada QR Prezıdenti Qasym-Jomart Toqaevqa senim gramotasyn tapsyrǵannan keıin BAQ ókilderine arnalǵan brıfıngte AQSh Elshisi Ýılıam Mozer aıtty, dep habarlaıdy QazAqparat tilshisi.
«Qazaqstan Prezıdenti Qasym-Jomart Toqaevqa AQSh-tyń Qazaqstandaǵy Elshisi retindegi qyzmetimniń bastalǵandyǵyn rastaıtyn senim gramotasyn tapsyrý men úshin úlken qurmet boldy. Osydan 20 jyl buryn Almatydaǵy Elshilikte jumys istegen edim jáne osy elge qaıta oralǵanyma qýanyshtymyn. Meniń birinshi jáne sońǵy kelgen ýaqytymnyń aralyǵynda Qazaqstan qol jetkizgen úlken tabysty zor rızashylyqpen atap ótkim keledi», - dedi ol.
Sonymen qatar, AQSh Elshisi Qazaqstannyń jańa elordasynyń zamanaýı kelbetine, sáni men sáýleti kelisken ǵımarattarǵa tánti bolǵandyǵyn da atap ótti.
«Qazaqstan aıtarlyqtaı progreske qol jetizgen. Halqynyń ómir súrý deńgeıi aıtarlyqtaı jaqsaryp, ál-aýqaty arta túsken. Buǵan qosa, Qazaqstanmen keńeıtilgen strategııalyq áriptestigimizdiń mańyzdylyǵyna joǵary baǵa beremiz. Qazaqstannyń Tuńǵysh Prezıdenti Nursultan Nazarbaevtyń strategııasy men batyldyǵyn joǵary baǵalaımyz. Ol Qazaqstandy ıadrolyq qarýdy taratpaý salasyndaǵy kóshbasshyǵa aınaldyrdy. Prezıdenttiń bul mindettemesi bizdiń áriptestigimizdiń negizi bolyp qala beredi», - dedi Ýılıam Mozer.
Ol Qazaqstannyń amerıkalyq kompanııalar tarapynyń kommertsııalyq ınvestıtsııalaryna ashyq ekendigin de atap ótti. Bul eki elge de paıda ákeletindigin basa aıtty.
«Ótken jyldardyń ishinde Qazaqstan Ortalyq Azııada, sonymen qatar álemdik arenada da kóshbasshyǵa aınalǵanyn atap ótkim keledi. Qazirgi ýaqytta Qazaqstan kóptegen salalarda, BUU Qaýipsizdik keńesiniń halyqaralyq protsesterinde mańyzdy rólge ıe. Sondaı-aq, Qazaqstan barlyq janjaldardy beıbit jolmen sheshýdiń jaqtaýshysy boldy jáne solaı bolyp qala beredi. Qazaqstannyń Tuńǵysh Prezıdenti Nursultan Nazarbaevqa birneshe ondaǵan jyl danalyqpen elge basshylyq jasaǵan úshin qurmetim men rızashylyǵymdy bildirgim keledi. Ol eń qıyn kezeńderdiń ózinde Qazaqstandy Táýelsizdikke, egemendikke, gúldenýge bastady. Qurmetti Prezıdent Q.Toqaevpen birleske jumysymyz jemisti bolaryna senim artamyn»,- dedi AQSh Elshisi.
