«AQSh - elimiz úshin mańyzdy strategııalyq seriktes» - baspasózge sholý
***
Keshe Qazaqstan Respýblıkasy Premer-Mınıstriniń orynbasary Berdibek Saparbaev bastaǵan jumys toby Batys Qazaqstan oblysynda boldy. Oral áýejaıyna qonǵannan keıin Úkimet basshysynyń orynbasary Bórli aýdanyndaǵy Berezovka aýylyna baǵyt ustap munda turǵyndarmen, pedagogıkalyq ujym múshelerimen jáne ata-analarmen kezdesti. Kezdesý barysynda atalǵan aýylda balalardyń ýlanýyna qatysty oryn alǵan oqıǵa ózara talqylaýlar men pikir almasýlardyń basty ózegine aınaldy. Osy jaıttar arqaý bolǵan maqala «Egemen Qazaqstan» gazetiniń senbilik sanynda «Naqty sheshimder alynbaq» degen taqyryppen berildi. «Bul máselege qatysty Berdibek Máshbekuly respýblıkalyq komıssııa qurylǵanyn málimdedi. Onyń quramynda sarapshy mamandar men ekologtar, dárigerler men kásipodaq ókilderi bar. Oǵan esimi respýblıkaǵa tanymal azamat Uzaqbaı Qarabalın jetekshilik jasaıdy. Premer-Mınıstrdiń orynbasarynyń málimdeýinshe, komıssııa músheleri 2015 jyldyń 20 qańtaryna deıin oryn alǵan oqıǵanyń sebepteri men saldarlaryn jan-jaqty ári egjeı-tegjeıli anyqtap, naqty sheshimge keletin bolady. Sonymen birge, ýlaný oqıǵasyna qatysty oǵan kináli zańdyq tulǵalar tıisti jaýapkershilikke tartylmaq. Bul ispen prokýratýra organdary aınalysatyn bolady», - dep jazady basylym.
«Qazaqstan men Amerıka Qurama Shtattary arasyndaǵy ekonomıka, saýda jáne ınvenstıtsııalar, parlamentaralyq yntymaqtastyq salalaryndaǵy qarym-qatynastardyń odan ári tereńdetilýi Syrtqy ister mınıstri Erlan Ydyrysovtyń Vashıngtonǵa sapary barysynda qarastyrylǵan basty máseleler boldy», - dep jazady «Egemen Qazaqstan» gazeti búgingi sanyndaǵy «AQSh - elimiz úshin mańyzdy strategııalyq seriktes» degen taqyryptaǵy maqalasynda. Basylymnyń jazýynsha, E.Ydyrysov sapar barysynda Amerıka-Qazaqstan Іskerler qaýymdastyǵy uıymdastyrǵan dóńgelek ústelge qatysqan. Jıyn barysynda bıznes-qaýymdastyqtyń ókilderin ınvestıtsııalyq klımatty qolaılandyrý maqsatynda Qazaqstan Úkimeti qabyldap otyrǵan keń aýqymdy sharalarmen tanystyrdy. Sheteldik ınvestorlarǵa beriletin salyqtyq jeńildikter, ınvestıtsııalyq ombýdsmen laýazymyn qalyptastyrý, Qazaqstannyń 10 jetekshi ekonomıkalyq áriptes elderine vızasyz rejimniń iske qosylýy qarastyrylǵan zańnamalyq jáne basqa da jańalyqtar tolyǵymen nazarǵa usynyldy. Amerıkalyq bıznesmenderdi «Nurly Jol» baǵdarlamasyn júzege asyrý aıasynda Qazaqstannyń, aldaǵy ýaqytta Dúnıejúzilik saýda uıymyna kirýi, EKSPO-2017 halyqaralyq mamandandyrylǵan kórmesine daıyndyq, sondaı-aq, 2015 jyldyń 1 qańtarynan bastap Eýrazııalyq ekonomıkalyq odaq qurý jónindegi kelisimniń kúshine enýi sheńberinde Qazaqstanmen yntymaqtastyqty keńeıtý múmkindikteri qyzyqtyrdy.
***
«Aıqyn» gazetinde L.N.Gýmılev atyndaǵy Eýrazııa Ulttyq ýnıversıtetiniń professory, ekonomıka ǵylymdarynyń doktory: Myrzageldi Kemelmen aradaǵy suhbat «Táýelsizdik elimizdiń jarqyn bolashaǵyna jol ashty!» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Búgingi tańda elimizde ekonomıkany nyǵaıtýǵa jáne jalpy, istiń jaǵdaıyn jaqsartýǵa baǵyttalǵan eń mańyzdy baǵdarlamalarǵa kelsek, Elbasy onyń tórt baǵytyn belgiledi: birinshi - aýyl sharýashylyǵyn júıeli órkendetý. Bul úshin agroónerkásiptik keshendi jáne selolyq aýmaqtardy memlekettik retteý júzege asyrylyp, aýyl-selolardy damytý, jekelegen baǵdarlamalar arqyly emes, keshendi josparlar men ony qarjylyq qoldaýlar arqyly júrgizilmek. Ekinshi - ındýstrııalyq-ınnovatsııalyq baǵdarlamany júzege asyrý. Úshinshiden, Kaspıı men basqa da baǵaly ken oryndarynyń qazba baılyǵyn ıgerý jalǵastyrylady. Tórtinshiden, ınfraqurylymdy barynsha jetildirý jolynda aýqymdy ister atqarylmaq», - deıdi.
***
«Vremıa» gazetinde «Astana» velokomandasynyń basy menedjeri Aleksandr Vınokýrovpen aradaǵy suhbat jaryq kórdi. Onda Qazaqstannyń dańqty sportshysy sońǵy birneshe aı boıy komanda músheleri arasyndaǵy dopıng daýyna, aldaǵy maýsymdaǵy josparlaryna qatysty tolymdy pikir bildirgen. Sonymen qatar ol «Astananyń» eýropalyq qarsylastarynyń jáne sheteldik BAQ-tardyń búginde álemdegi eń tanymal, úzdik velokomandany aıaqtan shalýyn qynjylyspen áńgimelegen.
