AQSh elge kóshkisi keletinderge «altyn kartalardy» usynady

ASTANA. KAZINFORM – AQSh baı sheteldikterge AQSh-ta turýǵa jáne jumys isteýge quqyq beretin jáne el azamattyǵyn alýǵa jol ashatyn «altyn kartalardy» satady, dep habarlaıdy DW aqparat agenttigi. 

AQSh prezıdenti Donald Tramp Sopaq kabınette tilshiler aldynda sóılegen sózinde «altyn kartanyń» quny shamamen 5 mln AQSh dollaryn quraıtynyn atap ótti.

— Biz altyn kartany satpaqpyz. Sizde jasyl karta bar. Al bul — altyn karta. Biz bul kartany shamamen 5 mln dollarǵa baǵalaımyz jáne ol sizge jasyl kartanyń artyqshylyqtaryn beredi, sonymen qatar ol azamattyq alýǵa jol salady. Dáýletti adamdar osy kartany satyp alyp, elimizge keledi, — dedi Donald Tramp. 

AQSh-tyń Saýda mınıstri Hovard Lıýtnıktiń túsindirýinshe, altyn karta úkimettiń EB-5 ımmıgratsııalyq vıza baǵdarlamasyn almastyrady.

Tramptyń aıtýynsha, altyn kartalardy satý eki aptadan keıin bastalýy múmkin. Ol mıllıondaǵan karta satylatynyn shamalap otyr.

— Quqyqtyq turǵydan alǵanda, bul zańdy, — dedi AQSh prezıdenti.

Buǵan deıin AQSh Kongresi zańsyz ımmıgranttardy qamaýǵa alý týraly zań qabyldady.

Eske sala ketsek, Donald Tramp ókilettiginiń úshinshi kúninde AQSh-tyń ońtústik shekarasyn zańsyz ımmıgranttar úshin jaýyp, olardy deportatsııalaýdy ulǵaıtýǵa baǵyttalǵan jarlyqtarǵa qol qoıdy. 

Buǵan deıin AQSh 119 zańsyz mıgrantty Panamaǵa deportatsııalaǵanyn jazǵan bolatynbyz.

Sondaı-aq AQSh 135 zańsyz mıgrantty deportatsııalaıdy, olardyń jartysy — balalar ekenin jazdyq. 

AQSh-ta shetel azamattaryna qandaı vızalar beriletinin myna materıaldan oqı alasyz.