AQSh ekonomıkasynyń ósýi baıaýlady
ASTANA. 3 maýsym. QazAqparat - AQSh prezıdenti Barak Obama óz ákimshiliginiń el ekonomıkasyn qalpyna keltirý áreketteriniń ázirge jemisin bermeı otyrǵanyn moıyndady.
Bul týraly Aq Úı basshysy Mınnesota shtatynda saılaýshylar aldynda sóılegen sózinde aıtty, dep habarlaıdy "Habar" telearnasy.
Jýyrda Eńbek mınıstrligi taratqan málimetterge sáıkes, eldegi jumyssyzdyq deńgeıi mamyr aıynda 8,2 paıyzǵa jetken, al, ekonomıkanyń aýyl sharýashylyǵynan tys salalarynda bastapqyda boljaǵandaı 150 myń emes, 69 myń jumys oryndary ashyldy. Qurylǵan jańa jumys oryndarynyń sany sońǵy jyldaǵy eń tómengi kórsetkish boldy. Jumyssyzdyq jónindegi málimetter AQSh-taǵy saılaý dodasyna áser eteri sózsiz. Óıtkeni, saılaýǵa demokrattar atynan túsetin Aq Úıdiń qazirgi basshysy Barak Obama men Mıtt Romnı de saılaý dodasynda ekonomıka máselelerin basty taqyryp retinde almaq.
