AQSh Ebola vırýsyna qarsy vaktsınany synaý tájirıbesine qatysatyn eriktilerdi irikteıdi
ASTANA. QazAqparat - AQSh Serra-Leoneniń densaýlyq saqtaý jáne sanıtarııa mınıstrligimen birlesip Ebola vırýsynan týyndaǵan aýrýǵa qarsy VSV-ZEBOV vaktsınasyn synaý úshin 6 myń eriktini jınamaq. Olardyń qataryna vırýspen kontaktige túsý yqtımaldyǵy joǵary atalmysh afrıkalyq elde jumys istep júrgen medıtsına qyzmetkerleri alynady, dep habarlaıdy TASS.
Bul tájirıbeniń qatysýshylary kezdeısoq retpen eki topqa irikteledi. Olardyń birinshisine vaktsına birden qoldanylady, al ekinshi topqa ol alty aıdan soń egiledi. Barlyq eriktilerdi mamandar vaktsınanyń qanshalyqty tıimdi áseri baryn anyqtaý úshin únemi qadaǵalap otyrady. Ǵalymdar VSV-ZEBOV vaktsınasy ımmýndyq reaktsııa týdyryp, adamdy atalymysh vırýstan qorǵaıtyn bolady dep úmittenedi. Jalpy, epıdemııa bastalǵaly Gvıneıa, Lıberııa jáne Serra-Leonede 10 604 adam qaza tapty, 25 591 adam atalǵan vırýsty juqtyrdy. Dert Malı, Nıgerııa, Senegal, Ispanııa, Ulybrıtanııa jáne AQSh-ta da tirkelgen. Alaıda bul elderde Ebola juqtyrǵandardyń sany on adamnan aspaıdy. Nıgerııada 20 adam Ebola dertine shaldyǵyp, segiz adam qaza tapty.
