AQSh Dúnıejúzilik densaýlyq saqtaý uıymynan shyǵatynyn resmı málimdedi
NЬıÝ-IORK. QazAqparat – Amerıka Qurama Shtattary Dúnıejúzilik densaýlyq saqtaý uıymynyń (DDU) quramynan shyǵady. Bul týraly QazAqparat BUU Jańalyqtar ortalyǵyna silteme jasap habarlaıdy.
AQSh bul týraly DDU jarǵysynyń depozıtarııi sanalatyn - BUU Bas hatshysy Antonıý Gýterrıshti habardar etken. Sheshim 2021 jyly 6 shildede kúshine enýi tıis.
Aqparatty BUU Bas hatshysynyń baspasóz hatshysy Stefan Dıýjarrık rastady. Qurama Shtattary 1948 jyldyń 21 maýsymynan beri Dúnıejúzilik densaýlyq saqtaý uıymynyń quramynda.
Álem elderi Dúnıejúzilik densaýlyq saqtaý uıymyna belgili bir shartpen qabyldanady. Uıym quramynan shyǵýǵa nıetti memleket bul qadamy týraly bir jyl buryn habardar etýge tıis. Sondaı-aq DDU aldyndaǵy óziniń qarjylyq mindettemelerin tolyq óteýge mindetti.
Al BUU Bas hatshysy DDU Jarǵysynyń depozıtarııi retinde ol memlekettiń Uıymnan shyǵýy úshin barlyq sharttardyń saqtalǵan-saqtalmaǵanyn tekseredi.
