AQSh dollary men eýrony satý men satyp alý arasyndaǵy aýytqý shegi belgilendi
NUR-SULTAN. QazAqparat - Ulttyq bank aıyrbastaý pýnktileri arqyly júrgiziletin operatsııalar boıynsha shetel valıýtasyn teńgege satyp alý baǵamynyń satý baǵamynan aýytqý shegin belgiledi, dep habarlaıdy QazAqparat.
Qazaqstan Ulttyq banki qarjy naryǵy qatysýshylarynyń valıýtalardy satyp alý jáne satý baǵamy arasynda negizsiz joǵary marjany ornatýyna jol bermes úshin shuǵyl shara qabyldady.
19 naýryzda qarjy uıymy arnaıy qaýly qabyldady. Qaýlyda ýákiletti bankterdiń jáne ýákiletti uıymdardyń aıyrbastaý pýnkti arqyly júrgiziletin operatsııalar boıynsha shetel valıýtasyn satyp alý baǵamynyń satý baǵamynan aýytqý shegi bylaı belgilendi:
- AQSh dollary - 6 teńge
- Eýro - 7 teńge.
Bul sharalar elde tótenshe jaǵdaı rejımi kezinde iske asady jáne ishki valıýta naryǵyna syrtqy faktorlardyń turaqsyzdandyratyn áserin shekteýge jáne qarjylyq turaqtylyqty qamtamasyz etýge járdemdesýge baǵyttalǵan.
Qaýlynyń tolyq mátinimen Ulttyq banktiń resmı ınternet-resýrsynda tanysýǵa bolady.
