AQSh dıplomattaryna qytaılyqtarmen romantıkalyq qarym-qatynas ornatýǵa tyıym salǵany ras pa
ASTANA. KAZINFORM – AQSh úkimeti Qytaıdaǵy dıplomatııalyq qyzmetkerler men olardyń otbasylaryna, sondaı-aq qaýipsizdik ruqsaty bar merdigerlerge jergilikti turǵyndarmen kez kelgen romantıkalyq nemese jynystyq qarym-qatynas ornatýǵa tyıym saldy, dep habarlaıdy Kazinform «Deutsche Welle» (DW) basylymyna silteme jasap.
Bul saıasat AQSh-tyń Qytaıdaǵy elshisi Nıkolas Bernstiń osy jyldyń qańtarynda Qytaıdan ketkenge deıin júzege asyrylǵan, alaıda BAQ ókilderine jaqynda ǵana málim boldy.
Buǵan deıin keıbir amerıkalyq mekemeler osyndaı qarym-qatynastarǵa qatysty qatań shekteýler engizgenimen, qyrǵı qabaq soǵystan keıin mundaı aýqymdy tyıym týraly habarlanǵan emes.
DW-niń habarlaýynsha, ótken jyldyń jazynda AQSh Qytaıdaǵy dıplomatııalyq ókildikterinde qyzmet etetin tulǵalarǵa jergilikti kúzet qyzmetkerlerimen jáne basqa da qytaılyq personalmen romantıkalyq qarym-qatynas ornatýǵa tyıym salǵan bolatyn. Al Berns elshi bul shekteýdi barlyq qytaı azamattaryn qamtıtyndaı etip keńeıtken.
Jańa ereje AQSh-tyń Beıjińdegi elshiligin, Gýanchjoý, Shanhaı, Shenıan jáne Ýhandaǵy bas konsýldyqtardy, sondaı-aq Gonkongtaǵy amerıkalyq konsýldyqty qamtıdy. Tyıym qańtar aıynda aýyzsha jáne elektrondy habarlamalar arqyly jetkizilgenimen, resmı túrde jarııalanǵan joq. AQSh Memlekettik departamenti bul másele boıynsha túsinikteme berýden bas tartty.
Sarapshylardyń pikirinshe, Qyrǵı qabaq soǵysy jyldarynda AQSh-tyń sheteldegi dıplomatııalyq qyzmetkerleri qarsy barlaý qyzmetteriniń erekshe nazarynda bolǵan. 1980-jyldardyń sońynda AQSh úkimeti Keńes Odaǵy, Shyǵys Eýropa jáne Qytaıdaǵy dıplomatııalyq qyzmetkerlerine jergilikti turǵyndarmen jynystyq qarym-qatynas ornatýǵa tyıym salǵan bolatyn. Biraq Keńes Odaǵy ydyraǵannan keıin bul shekteýler jumsartyldy.
Qytaıdaǵy jańa ereje kúshine engenge deıin amerıkalyq dıplomattar jergilikti turǵyndarmen jaqyn qarym-qatynas ornatqan jaǵdaıda ony basshylyqqa habarlaýǵa mindettelgen, biraq tikeleı tyıym salynbaǵan edi.
Osyǵan deıin Prezıdent Donald Tramp AQSh-tyń barlyq saýda seriktesi úshin 10% tarıfti jáne óziniń «Amerıka birinshi kezekte» atty baǵdarlamasy aıasynda ózge ondaǵan memleketke joǵary baj salyǵyn engizýdi qarastyratyn, barlyq salany qamtıtyn paketin usynǵanyn jazǵan edik.