AQSh deportatsııalanǵan mıgranttardy úshinshi elderge jiberýge 410 mln dollar bólmek
ASTANA. KAZINFORM — Tramp ákimshiligi Amerıka Qurama Shtattarynan 31 elmen kelisim jasasyp, deportatsııalanǵan mıgranttardy sol elderge jiberý úshin keminde 410 mıllıon dollar bólýge ýáde berip otyr, dep habarlaıdy The Washington Post basylymy.
Basylymnyń jazýynsha, bul derekterdi 2026 jyldyń maýsym aıynyń sońyndaǵy AQSh úkimetiniń ishki qujattarynan kórýge bolady. Vashıngton mıgranttardy qabyldaýǵa kelisim bergen jáne bul jóninde kelissóz júrgizip otyrǵan memeketterdiń kópshiligi — Afrıka men Latyn Amerıkasy elderi.
Úshinshi eldermen jasalǵan kelisimder boıynsha AQSh deportatsııalanǵan mıgranttardy óz otanyna emes, kerisinshe azamattyǵy joq jáne buryn eshqandaı baılanysy bolmaǵan elderge jibere alady.
Kelissózderdi AQSh Memlekettik departamentiniń janynan qurylǵan Office of Remigration júrgizip jatyr. Shamamen 15 qyzmetkeri bar keńse Halyq, bosqyndar jáne mıgratsııa bıýrosynyń quramyna kiredi. Ony Memlekettik departamenttiń qyzmetkeri Krıstıan Erhardt basqarady. The Washington Post basylymynyń málimetinshe, Erhardt deportatsııalanǵan mıgranttardy qabyldaý boıynsha ártúrli elderdiń bılik organdarymen kelissózder júrgizip jatyr. Maýsym aıynda ol Kot-d'Ivýar, Gambııa, Gvıneıa-Bısaý, Togo jáne Gabon sııaqty elderge barǵan.
Kelisimderdiń qarjylyq sharttary ártúrli. Basylym tanysyp shyqqan qujattarǵa sáıkes, 13 eldiń úkimetterine tikeleı tólem retinde shamamen 81 mıllıon dollar aýdarylady. AQSh ákimshiligi Halyqaralyq kóshi-qon uıymyna taǵy 179 mıllıon dollar, al BUU-nyń Bosqyndar isteri jónindegi joǵarǵy komıssarynyń basqarmasyna kelisimderge qatysýshy elderdegi bosqyndarǵa qatysty jobalar men ınfraqurylymdy damytý úshin 124 mıllıon dollar jiberýge ýáde berdi.
Degenmen, atalǵan halyqaralyq uıymdar remıgratsııa týraly kelisimderdiń tikeleı taraptary emes. The Washington Post gazetiniń qujattar men derekkózderge silteme jasaı otyryp jazǵanyna qaraǵanda, Vashıngton men qabyldaýshy úshinshi elderdiń úkimetteri arasyndaǵy kelissózder barysynda jobalardy osy uıymdar arqyly qarjylandyrý talqylanǵan.
Qabyldanatyn mıgranttar sany, olardyń azamattyǵy jáne sottylyǵynyń bar-joǵyna qaraı ár elmen ártúrli kelisim jasalǵan. Keı elder deportatsııalanǵandardy ýaqytsha ornalastyra turýǵa, keıinnen olardy basqa elge jiberýge kelisim bergen.
Basylymnyń málimetinshe, mundaı kelisimder aıasynyń keńeıýi — Donald Tramp ákimshiliginiń AQSh-tan deportatsııalanatyn mıgranttar sanyn kóbeıtýge baǵyttalǵan ımmıgratsııalyq saıasatynyń bóligi.
Eske sala keteıik, buǵan deıin AQSh zańsyz mıgranttardy deportatsııalaý úshin memlekettik áýe kompanııasyn quratynyn habarlaǵan edik.
Nurlan Tuıaqov
