AQSh Demokratııalyq partııasynyń ókilderi «robottarǵa salyq» engizýdi talap etti

ASTANA.KAZINFORM — Demokrattar kompanııalar adamdardy tehnologııalarmen almastyryp jatqandyqtan, «robottarǵa salyq» engizýdi talap etip otyr. Óıtkeni jasandy ıntellekt (JI) AQSh-ta 100 mıllıonǵa deıin jumys ornyn almastyrýy múmkin, dep habarlaıdy Kazinform agenttiginiń menshikti tilshisi FOX Business-ke silteme jasap.

Taldaý Densaýlyq saqtaý, bilim berý, eńbek jáne zeınetaqy máseleleri jónindegi Senat komıtetiniń ókilderimen júrgizilgen, baıandamany Vermont shtatynan senator Bernı Sanders daıyndaǵan.

Ekonomıkanyń 20 negizgi salasy zerttelip, onyń 15-inde jumys oryndarynyń jartysynan kóbi JI nemese robototehnıka júıelerimen almastyrylýy múmkin ekeni anyqtalǵan.

Esepke sáıkes, eń kóp zardap shegetinder — fastfýd qyzmetkerleri men satýshylar. Bul salada 3 mıllıonǵa jýyq jumys orny joıylady, bul saladaǵy qyzmetkerlerdiń shamamen 89%-yn quraıdy.

Joǵary qaýip tóngen basqa salalarǵa klıentterge qyzmet kórsetý, júk tasymaldaý jáne keńse kómekshileri jatady. Boljam boıynsha, bul salalardaǵy avtomattandyrý deńgeıi 80%-dan asady.

Baıandamada negizgi usynystardyń biri – robottarǵa salyq salý. ıAǵnı, kompanııalar árbir adamdy mashınamen, tehnologııamen nemese algorıtmmen almastyrǵany úshin arnaıy tólem tóleýi tıis.

Bul qarajat jalaqydan alynatyn salyqtardyń ornyn toltyrýǵa jáne jumystan shyǵarylǵan qyzmetkerlerdi qaıta daıarlaý baǵdarlamalaryn qoldaýǵa baǵyttalady.

Microsoft negizin qalaýshysy Bıll Geıts te uqsas pikir bildirip, avtomattandyrýdan paıda kórip otyrǵan kompanııalar ekonomıkalyq qıyndyqtardy jumsartý úshin «ádil úles» tóleýi kerek dep málimdegen.

Buǵan deıin Figure AI kompanııasy bir kúni adamdardyń ornyn basýy múmkin gýmanoıd robottardy jasap shyǵarǵany habarlanǵan bolatyn. Bul robottar negizgi tapsyrmalardy oryndaı alady.

Aıta keteıik, Qytaıda jasandy ıntellektpen aınalysatyn 5 300-den astam kompanııa bar.