AQSh delegatsııasynyń eki ushaǵy Islamabadqa qondy
ASTANA. KAZINFORM — Islamabadta AQSh-tyń «aldyn ala toby» bar eki ushaq qondy. Bul top AQSh pen Iran arasyndaǵy kelissózderdiń ekinshi raýndyna qatysady, dep habarlady Pákistan bıliginiń ókilderi Anadoly agenttigine.
Eki el delegatsııalary arasyndaǵy negizgi kelissózder dúısenbi, 20 sáýir kúni Pákistanda ótedi dep kútiledi.
Resmı tulǵalar Vashıngtonnan kelgen aldyn ala top mingen eki ushaqtyń Pákistan astanasyna qonǵanyn rastady.
Sonymen qatar Geo News telearnasynyń habarlaýynsha, Islamabad polıtsııasy AQSh–Iran kelissózderiniń ekinshi kezeńine baılanysty qaýipsizdik sharalaryn kúsheıtkenin málimdedi.
Buǵan deıin Pákistan úkimettik derekkózderi «Anadoly» agenttigine AQSh pen Iran delegatsııalarynyń dúısenbi kúni Islamabadta kezdesý yqtımaldyǵy joǵary ekenin habarlaǵan bolatyn.
Eske salsaq, sáýirdiń basynda Iran delegatsııasy AQSh-pen yqtımal kelissózderge qatysý úshin Islamabad qalasyna barǵany belgili boldy.
Sondaı-aq, AQSh vıtse-prezıdenti Djeı Dı Vens 10 sáýir kúni Pákistanǵa ushyp ketkeni de aıtyldy.
Óz kezeginde Pákistan premer-mınıstri Shahbaz Sharıf AQSh pen Iran arasyndaǵy kelissózderdiń sátti ótýi úshin eliniń barlyq múmkindikti qoldanatynyn málimdedi.
Alaıda Iran men AQSh Pákistandaǵy kelissózderde soǵysty toqtatý týraly kelisimge kele almady.
