AQSh DDU-ny koronavırýstyń paıda bolýyn zertteýdi jalǵastyrýǵa shaqyrdy
VAShINGTON. QazAqparat – Beısenbi kúni AQSh Dúnıejúzilik densaýlyq saqtaý uıymynyń basshylyǵyna koronavırýs ınfektsııasynyń paıda bolýyn zertteýdiń ekinshi kezeńin ótkizýdi usyndy.
Bul, sonymen qatar, táýelsiz mamandarǵa Qytaıda ótkizilip jatqan taldaýlar men bastapqy derekterdi berýdi qarastyrady, dep habarlaıdy QazAqparat, Reuters -ke silteme jasap.
Ýhan qalasynda qytaılyq zertteýshilermen birge tórt apta bolǵan Dúnıejúzilik densaýlyq saqtaý uıymynyń toby naýryz aıynda óziniń esebinde vırýstyń janýarlar arqyly jarqanattardan adamdarǵa juǵýy múmkin ekenin aıtqan.
Sonymen qatar, olardyń aıtýynsha, juqtyrýdyń zerthanalyq jylystaný saldarynan bolýy ekitalaı.
Jenevadaǵy BUU-nyń amerıkalyq mıssııasynyń ókili beısenbi kúni óziniń málimdemesinde DDSU júrgizgen koronavırýs ınfektsııasynyń paıda bolýyna qatysty zertteýlerdiń birinshi kezeńin «jetkiliksiz jáne dálelsiz» dedi. Ol zertteýlerdiń ekinshi kezeńin ótkizýge qolqalap, jedeldikke, ashyqtyqqa jáne jetkilikti kólemdegi derekterdi berýge shaqyrdy.
«Qytaıdyń táýelsiz zertteýshilerge vırýs pen pandemııanyń paıda bolý kózine qatysty bastapqy derekter men taldaýlardy usynýy mańyzdy», - delingen habarlamada.
Óz kezeginde, beısenbi kúni AQSh-taǵy Qytaı elshiliginiń ókili álem boıynsha tirkelgen koronvırýs ınfektsııasynyń barlyq erte oqıǵalaryna tolyq zertteý júrgizýge, sonymen qatar álem boıynsha keıbir jasyryn bazalar men bıologııalyq zerthanalardy egjeı-tegjeıli zertteýge shaqyrdy.
Jenevadaǵy BUU-daǵy Brıtanııa elshili Saımon Menlı de jedel, ashyq jáne dálelderge negizdelgen zertteýlerdiń ekinshi kezeńin júrgizýge shaqyrdy.
Sársenbi kúni bolǵan densaýlyq saqtaý mınıstrleriniń jyl saıynǵy kezdesýi kezinde DDSU-nyń jetekshi sarapshysy Maık Raıan múshe eldermen zertteýlerdiń ekinshi kezeńiniń mazmuny týraly keńesý ótkizilgenin aıtty. Onyń aıtýynsha, uqsas talqylaýlar taǵy aldaǵy aptalar kezinde jalǵasyn tappaq.
Ádilet Seıilhanov
