AQSh BUU-nyń Gazada atysty toqtatý týraly qararyna veto qoıdy
ASTANA. KAZINFORM – Qarardy BUU Qaýipsizdik Keńesiniń turaqty emes 10 múshesi ázirlegen. Onda Gaza sektorynda atysty jyldam toqtatý týraly aıtylǵan. Qararǵa AQSh-ty qospaǵanda Keńestiń qalǵan 14 múshesi daýys berdi, dep habarlaıdy Kazinform-nyń menshikti tilshisi.
Sondaı-aq qarar Gaza sektoryndaǵy ızraıldik tutqyndardyń barlyǵyn «dereý jáne sózsiz bosatýdy» talap etedi. Vashıngton Gazadaǵy atysty kelisimsiz toqtatý talabyna qarsy shyqty.
AQSh-tyń BUU-daǵy arnaıy ókiliniń orynbasary Robert Výd Nıý-Iorktegi sessııada daýys berý aldynda AQSh tek atysty toqtatý aıasynda kepilge alynǵandardy dereý bosatýdy naqty talap etetin qarardy ǵana qoldaıtynyn málimdedi.
«Biz buǵan deıin birneshe ret málimdegenimizdeı, kepilge alynǵandardy bosatpaı atysty toqtatýdy qoldaı almaımyz. Soǵys kepilge alynǵandardy bosatýmen aıaqtalýy kerek. Bul eki ózekti maqsat bir-birimen tyǵyz baılanysty. Bul qarar bul qajettilikti joqqa shyǵardy, sondyqtan Qurama Shtattar ony qoldaı almady», - dedi AQSh-tyń BUU-daǵy resmı ókili.
Jalpy AQSh atysty toqtatý Gazada kepilge alynǵan barlyq adamnyń aman-esen bostandyqqa shyǵýymen baılanysty bolýy kerek dep sanaıdy.
Izraıldiń BUU-daǵy Elshisi Dennı Danon AQSh-qa veto quqyǵyn paıdalanǵany úshin alǵys aıtyp, Baıden ákimshiligi «adamgershilik pen ádilettilik jaǵynda» ekenin málimdedi.
Al Palestınanyń BUU-daǵy ókiliniń orynbasary Madjed Bamııa Qaýipsizdik keńesiniń sársenbi kúni tańerteń ótken otyrysynda atysty toqtatý kóptegen adamnyń ómirin saqtap qalady dedi.
«Álem jazyqsyz palestınalyqtardyń ólimine, ash júrgen palestınalyq balalarǵa, balalaryn alyp, bir jerden ekinshi jerge májbúrli qonys aýdarǵan analarǵa úırenbeýi kerek», - dedi Palestına ókili.
Aıta ketetin jaıt, bul AQSh prezıdenti Djo Baıden ákimshiliginiń Izraıl ótken qazan aıynda áskerı shabýylyn bastaǵannan beri Gaza sektoryndaǵy soǵysty toqtatýdy talap etetin qararǵa tyıym salyp otyrǵan tórtinshi jaǵdaı.
Eske salsaq, AQSh Palestınaǵa BUU-ǵa tolyq múshelik mártebesin berý týraly Qaýipsizdik Keńesiniń qararyna veto qoıdy.
