AQSh BUU Qaýipsizdik Keńesiniń Gazada adamdarǵa oq jaýdyrýyn aıyptaǵan málimdemesine tosqaýyl qoıdy
ASTANA. KAZINFORM – AQSh BUU Qaýipsizdik keńesiniń Gaza sektorynda gýmanıtarlyq kómek úshin jınalǵan palestınalyqtardy Izraıldiń atqylaýyn aıyptaǵan málimdeme qabyldaýyna kedergi jasady. Oqıǵa saldarynan 100-den astam adam zardap shekti, 750-den astamy jaraqat aldy, dep habarlaıdy Anadolu aqparat agenttigi.
Qaýipsizdik keńesiniń jabyq otyrysynan keıin qandaı da bir málimdeme jasalǵan joq. Izraılge qatysty synı málimdemelerdi qamtıtyn qarar jobasy AQSh-tyń BUU janyndaǵy turaqty ókildigi tarapynan maquldanǵan joq.
Qarar jobasynda bolǵan oqıǵaǵa qatysty qatty alańdaýshylyq bildirilgen.
Qujat barlyq tarapty halyqaralyq gýmanıtarlyq quqyqqa sáıkes Gaza sektoryndaǵy beıbit turǵyndardy negizgi qyzmetter men gýmanıtarlyq kómekke qoljetimdilikten aıyrýdan bas tartýǵa shaqyrady.
Joba avtorlary sondaı-aq shuǵyl sharalar qabyldanbasa, Gaza sektorynyń 2,2 mln halqyna áser etetin ótkir azyq-túlik daǵdarysy qaýpi tónip turǵanyn eskertti.
Qaýipsizdik keńesiniń músheleri Gazaǵa gýmanıtarlyq kómek aǵynyn jeńildetý úshin Izraıldi baqylaý-ótkizý beketin jappaýǵa shaqyrdy.
Gaza sektorynda gýmanıtarlyq kómek kútken palestınalyqtarǵa Izraıl armııasynyń jasaǵan soqqysynan qaza tapqandar sany 112 adamǵa jetti, taǵy 760 adam jaraqat alǵan.
Buǵan deıin habarlanǵandaı, Birikken Ulttar Uıymynyń (BUU) Bas hatshysy Antonıý Gýterrısh Gaza sektorynda kómek kútip turǵan 100-den astam beıbit turǵynnyń ómirin qıǵan shabýyldy aıyptap, gýmanıtarlyq atysty tez arada toqtatýǵa shaqyrdy.
