AQSh BUU Qaýipsizdik Keńesinde Gazada atysty toqtatý týraly qararǵa veto qoıdy

ASTANA. KAZINFORM – Amerıka Qurama Shtattary keıingi eki jylda altynshy ret BUU Qaýipsizdik Keńesinde Gaza sektory boıynsha qararǵa veto qoıdy.

Reseılik TASS agenttiginiń organnyń mereıtoılyq 10 000-shy májilisinen habarlaýynsha, Vashıngton dúnıejúzilik uıymnyń qarsy daýys bergen jalǵyz múshesi bolyp otyr. RF, Qytaı, Ulybrıtanııa men Frantsııa sııaqty uıymǵa múshe ózge elder qarardy qoldap daýys berdi.

Qarardyń avtorlary Qaýipsizdik Keńesiniń turaqty emes músheleri Aljır, Danııa, Gaıana, Pákistan, Panama, Koreıa Respýblıkasy, Serra-Leone, Slovenııa men Somalı boldy.

Onda shuǵyl, eshqandaı sharttarsyz, laıyqty túrde kepildegilerdi bosatý týraly aıtylǵan jáne Izraıldi Gazaǵa shuǵyl, eshqandaı sharttarsyz gýmanıtarlyq kómekti kirgizý úshin barlyq shekteýlerdi alyp tastaýǵa shaqyrady.

Qujat kómektiń barlyq sektor boıynsha esh kedergisiz, qaýipsiz taratylýyn jáne barlyq basty qajetti qyzmetterdi qalpyna keltirýdi talap etedi.

Aıta keteıik, BUU osyǵan deıin Gazada mert bolǵan palestınalyqtar sany resmı kórsetkishten 10 ese kóp bolýy múmkin ekenin aıtqan bolatyn.

Sondaı-aq Halyqaralyq gýmanıtarlyq uıymdar Izraıldiń Gazaǵa shabýylyn toqtatýǵa shaqyrdy.

BUU komıssııasy Izraıldiń Gazadaǵy áreketin genotsıd dep tanydy.