AQSh búkil álem boıynsha vıza berýdi toqtatty
ASTANA. KAZINFORM — Donald Tramp búkil álem boıynsha AQSh vızasyna suhbattasýǵa jazylýdy ýaqytsha toqtatty. Bul sheshim konsýldyq qyzmetterdi jahandyq deńgeıde qaıta uıymdastyrý jáne vıza alýǵa ótinish berýshilerdi tekserý sharalaryn kúsheıtý jumystarymen baılanysty, dep habarlaıdy Republic.
AQSh Memlekettik departamenti eldegi jáne sheteldegi barlyq elshilik pen konsýldyq qyzmetkerlerine arnalǵan jahandyq oqytý baǵdarlamasyn iske qosty. Osyǵan baılanysty vıza alýǵa ótinish berýshilerdi qabyldaý kestesi oqytý baǵdarlamasynyń talaptaryna sáıkes qaıta qaralady.
Suhbattasýǵa aldyn ala jazylyp qoıǵan ótinish berýshilerge elektrondy poshta arqyly kezdesýleriniń toqtatylǵany týraly habarlama jiberiledi. Sondaı-aq olarǵa suhbattasýdyń jańa kúni men ýaqyty keıinirek habarlanatyny eskertilgen.
Bul shara Donald Tramp ákimshiliginiń ımmıgratsııalyq baqylaýdy kúsheıtý saıasaty aıasynda qabyldanyp otyr. Atalǵan saıasat vıza men grın-kartaǵa ótinish berýshilerdi muqııat tekserýdi, deportatsııalaý naýqanyn kúsheıtýdi jáne bosqyndardy qabyldaý tártibin qaıta qaraýdy qamtıdy.
Eske salaıyq, osyǵan deıin AQSh-ta 200 myń sheteldik vızasynan aıyrylýy múmkin ekenin habarladyq.
