AQSh búgin Táýelsizdik kúnin toılaıdy

Barlyq jerde bul kúni úkimettik mekemeler, poshta bólimsheleri, bankter, mektepter, Nıý-Iork qor bırjasy jabyq bolady.

Beısenbiniń ózinde Nıý-Iorkte qaladan shyǵatyn iri magıstraldarda kóliktiń shoǵyrlanǵany baıqalǵan. Myńdaǵan megapolıs turǵyndary janar-jaǵarmaıdyń qymbattaýyna da qaramastan, tabıǵatta demalýǵa bel býypty. Al qalanyń ortalyq kóshelerindegi temir tulparlardyń sany aıtarlyqtaı azaıǵan.

Búgin kóptegen amerıkandyq qalalarda sherýler men otshashýlar bolady.

AQSh-tyń Ulybrıtanııadan táýelsizdigin jarııalaǵan deklaratsııa 1776 jyly 2 shildede Fıladelfııa qalasynda qabyldandy. 2 kúnnen soń Kongress qujattyń ózgertilgen nusqasyn quptap, halyqqa taratý týraly ókim shyǵardy. Sondyqtan da AQSh-tyń táýelsiz el retindegi «týǵan kúni» 4 shilde bolyp sanalady.