AQSh bir aptada Iemenge 260 ret soqqy jasady

ASTANA. KAZINFORM – AQSh áskerı kúshteri sońǵy bir apta ishinde Iemen aýmaǵyna kem degende 260 áýe soqqysyn jasaǵan. Bul týraly Iemendegi «Ansar Allah» (hýsıtter) qozǵalysynyń jetekshisi Abdel Malek al-Hýsı málimdedi, dep jadazy TASS.

– Osy aptada Amerıka bombalaýshy ushaqtar men basqa da áskerı tehnıkany paıdalana otyryp, (Iemendegi) azamattyq nysandarǵa 260-tan astam soqqy jasady, – dedi al-Hýsı “Al Masirah” telearnasyna bergen suhbatynda.

Hýsıler jetekshisiniń aıtýynsha, joldar men kóshelerge, bazar men zıratqa shabýyl jasalǵan.
2023 jyly Gaza sektoryndaǵy qaqtyǵystyń ýshyǵýynan keıin hýsıtter Izraılge qarsy áreket etetinderin, sonymen qatar Izraılmen baılanysty kemelerdiń Qyzyl teńiz ben Bab-el-Mandeb buǵazy arqyly ótýine tosqaýyl jasaıtyndaryn eskertken.

Qańtar aıynyń ortasynda Gaza sektorynda ýaqytsha bitim ornap, hýsıtterdiń shabýyldary toqtaǵan edi. Alaıda naýryzdyń basynda bitim buzylǵan soń, olar Qyzyl teńizdegi ızraıldik kemelerge qaıta soqqy jasaı bastady.

15 naýryz kúni AQSh prezıdenti Donald Tramptyń buıryǵymen Iemendegi hýsıtterge qarsy aýqymdy áskerı operatsııa bastaldy. AQSh Ortalyq qolbasshylyǵy bul áreketterin «eldiń múddesin qorǵaý jáne teńiz joldarynyń qaýipsizdigin qamtamasyz etý» dep túsindirdi. Jaýap retinde «Ansar Allah» qozǵalysy Qyzyl teńizdiń soltústigindegi Harry Truman atty amerıkalyq áýe tasymaldaýshy kemege shabýyl jasaǵan.

Aıta keteıik, AQSh-tyń El-Hodeıda provıntsııasyndaǵy Ras-Isa munaı portyna jasaǵan áýe soqqysynan 74 adam qaza tapqanyn jazdyq.