AQSh Boston marafonyndaǵy lańkestik qurbandaryn eske alady
ASTANA. QazAqparat - AQSh-ta búgin budan bir jyl buryn Boston marafonynda bolǵan lańkestik qurbandaryn eske almaq, dep habarlady ITAR-TASS.
2013 jyly 15 sáýirde Bostonnyń ortalyǵynda marafon máresiniń mańynda eki jarylys oryn aldy. Úsh adam qaza taýyp, 260 adam jaralandy. AQSh ókimeti bul jarylystardy uıymdastyrýshy jáne oryndaýshy aǵaıyndy Tsarnaevtar - 26 jastaǵy Tamerlan men 20 jastaǵy Djohar dep sanaıdy.
Lańkestikten keıin birneshe kúnnen soń Tamerlan polıtsııamen atys kezinde óltirildi, Djohar Boston mańyndaǵy jeke úılerdiń biriniń aýlasyndaǵy katerden tabyldy jáne arnaıy operatsııa kezinde qolǵa tústi. Shilde aıynda onyń isi boıynsha alǵashqy sot tyńdaýlary boldy. Tsarnaev ózine taǵylǵan aıyptardyń barlyq 30 tarmaǵy boıynsha kinásin moıyndaǵan joq.
Oǵan qatysty sot endi osy jylǵy qarasha aıynda ótpek. Prokýrorlar oǵan ólim jazasyn berýdi talap etpek.
Negizgi eske túsirý sharalary Bostondaǵy konferents-ortalyqta ótedi. Oǵan AQSh vıtse-prezıdenti Djozef Baıden, Boston meri Martın Ýolsh, Massachýsets shtatynyń gýbernatory Deval Patrık, sondaı-aq lańkestik kezinde qaza bolǵan jáne zardap shekken adamdardyń týystary qatyspaq. Jergilikti ýaqytpen 14.30-da jarylys ornynda amerıkandyq jalaý kóterilip, únsizdik mınýty jarııalanady.
