AQSh boksshysy Kırklend Qanat Islamnyń jekpe-jegin kórip shyqty
ASTANA. QazAqparat - Áleýmettik jelilerde amerıkalyq boksshy Djeıms Kırklendtiń (32-2, 28 KO) Islam-Assıs jekpe-jegin kórip otyrǵany týraly vıdeo tarap júr.
Sol jekpe-jekte Qanat Islamnyń qabaǵy qatty jarylǵan edi. Alaıda qazaqstandyq boksshy óz qarsylasyn birinshi raýndta nokaýtpen jeńdi, dep habarlaıdy QazAqparat tilshisi Qazaqstannyń kásibı boks federatsııasyna silteme jasap.
Búginde Islam men Kırklendtiń komandalary kelissózder júrgizip jatyr. Eki boksshynyń jekpe-jegi 9 qyrkúıekte Astana qalasynda ótýi ábden múmkin. Kırklendtiń ózi Qazaqstanǵa kelýge qarsy emes. Sodan bolar, qazirdiń ózinde amerıkalyq boksshy óziniń kelesi qarsylasyn zertteı bastady. Áleýmettik jelide taraǵan vıdeoda Kırklend aǵymdaǵy jyly aqpan aıynda ótken Qanat Islamnyń kezekti jekpe-jegin tamashalap otyr. Brazılııalyq boksshy Robson Assıs nokaýtqa túskende Kırklend: "Ýaý, erkek eken, toqtat. Mynany qara...Tamasha...Kóbelekter usha bastady-aý", - dep óz emotsııasyn jasyrmady.
Aıta keteıik, Djeıms Kırklend 33 jasta. Osy ýaqytqa deıin ol eki-aq ret jeńilgen. Birinshi ret Golovkınniń burynǵy qarsylasy - japondyq Nabýxıro Ishıdadan nokaýt alsa, 2015 jyly GGG-diń kelesi qarsylasy - meksıkalyq Saýl Alvaresten de nokaýtpen utylǵan bolatyn. Sodan beri Kırklend rıngke shyqqan joq. Al qazaqstandyq Qanat Islam áli birde-bir ret jeńilmegen.
