AQSh Bilim mınıstrligi qyzmetkerleriniń jartysyna jýyǵy qysqartylady
ASTANA. KAZINFORM — AQSh Bilim mınıstrligi qyzmetkerleriniń kúrt qysqartylatynyn habarlady, dep jazady NBC News.
1300-ge jýyq qyzmetker jumystan bosatý týraly habarlama alady. Taǵy 600 adam jumystan ketý nemese zeınetkerlikke erte shyǵý týraly ótinishterdi óz erkimen qabyldaǵan.
Qazirgi ýaqytta mekemeniń Vashıngtondaǵy bas keńsesinde 3 myńǵa jýyq adam jumys isteıdi, al 1 myńǵa jýyq qyzmetker el boıynsha 10 aımaqtyq keńsede ornalasqan.
Ótken jyly mınıstrlik qyzmetine 268 mlrd dollar bólindi, bul federaldy bıýdjettiń 4 paıyzyn qurady.
Mınıstrlik seısenbi kúni taratqan málimdemesinde qandaı laýazymdar men vedomstvolardyń joıylatynyn jarııalamady, biraq bul barlyq departamentke áser etetinin habarlady.
Vedomstvo «agenttik quzyretine jatatyn barlyq zańnamalyq baǵdarlamalardy júzege asyrýdy jalǵastyratynyn» málimdedi.
Buǵan deıin Tramp federaldy qyzmetkerlerdi jumystan bosatý týraly buıryq bergenin jazǵan bolatynbyz.