AQSh bıyl BUU-ǵa bosqyndarǵa kómek úshin qosymsha 482 mln. dollar qarjy bóledi
ASTANA. 14 sáýir. QazAqparat - Barak Obamanyń Ákimshiligi BUU-nyń bosqyndar isi jónindegi Joǵarǵy komıssarynyń basqarmasy qoryna bıyl qosymsha 482 mln. dollar bóledi, dep habarlady ITAR-TASS.
Bul týraly keshe Memlekettik departament málim etken. Sonymen qatar ol AQSh ótken jylǵy 29 jeltoqsanda osy maqsatqa 125 mln. dollar bóletinin eske salǵan.
«Bul qarjylyq kómek bosqyndardyń Aýǵanstan jáne Kongo Demokratııalyq Respýblıkasy sııaqty elderge qaıta oralýyna, olardyń qoǵamǵa yqpaldasýyna, ornalasýyna jáne olardy qorǵaýǵa járdemdesetin bolady,- delingen taratylǵan málimdemede. - Sondaı-aq aqsha jańadan qonys tepkenderdi sýmen, taǵammen, dári-dármekpen, turǵyn úımen, bilimmen qamtamasyz etýge, Irak, Iemen, Nepal, Pákistan, Grýzııa, Ońtústik Sýdan, Chad jáne Kenııa sııaqty elderde bosqyndardy qorǵaýǵa jumsalmaq».
Afrıkada osyndaı kúsh-jiger jumsaýǵa 218 mln dollar, Azııa-Tynyq muhıt aımaǵyna - 62 mln.-ǵa jýyq, Eýropaǵa - 22 mln., Taıaý Shyǵys pen Soltústik Afrıkaǵa - 111 mln., Batys jartysharyna - 15,5 mln. dollar jumsalatyn bolady. Al naqty Sırııa bosqyndaryna 3 mln. dollar aýdarý josparlanýda.
Ótken jyly AQSh Bosqyndar isi jónindegi Joǵarǵy komıssar basqarmasyna jalpy kólemi 690 mln. dollar usyndy.
Memlekettik departamenttiń baǵalaýynsha, álemde 50 mln.-ǵa jýyq bosqyndar men qonysynan aıyrylǵan adamdar bar.
