AQSh bıligi D.Qadyrbaev pen A.Tájaıaqovqa qatysty sot isiniń bastalý merzimin ózgertýdi suraýda
ASTANA. 23 qańtar. QazAqparat - AQSh bıligi 2013 jyldyń sáýirindegi Bostandaǵy lańkestik áreketti tergeýge kedergi keltirdi dep aıyptalyp otyrǵan Djohar Tsarnaevtyń dostaryna qatysty istiń bastalý merzimin aýystyrýdy suraýda. Reseıdiń «Jańalyqtar» aqparat agenttiginiń habarlaýynsha, AQSh bıligi mundaı qadamǵa sot tyńdaýyna aıyptaýshylar tarabynan qatysýy múmkin eń basty kýágerlerdiń biriniń tabylýyna oraı barǵan.
Esterińizge sala keteıik, osydan birneshe kún buryn Boston federaldy sýdıasy Merıenn Boýler Boston marafonynyń máresinde bolǵan jarylysqa qatysty isti tergeýge kedergi keltirdi dep aıyptalǵan Dııas Qadyrbaev pen Azamat Tájaıaqovqa qatysty sot isi protsesin 2014 jyldyń 23 maýsymyna belgilegen edi. Aıta keteıik, 2013 jyldyń 15 sáýirinde Boston marafonynda eki jarylys oryn alyp, saldarynan 3 adam ajal qushty, 200-ge jýyǵy japa shekti. Keıin polıtsııa lańkesti jasaǵan eki kúdiktiniń izine shyǵyp, olar AQSh-ta zańdy túrde turyp jatqan Soltústik Kavkazdyń týmasy aǵaly-inili Tamerlan men Djohar Tsarnaevtar bolyp shyqty. Tártip saqshylarymen qaqtyǵys barysynda T. Tsarnaev qaza boldy. Al 19 jastaǵy D. Tsarnaev kóp uzamaı qolǵa tústi. Eger onyń kinási dáleldense, ol ómir boıy abaqtyǵa toǵytylady nemese ólim jazasyna kesiledi. Osy lańkestik is boıynsha Tsarnaevtyń úsh dosy qazaqstandyq Dııas Qadyrbaev pen Azamat Tájaıaqov jáne amerıkalyq Robel Fılıpposke Boston marafonynyń máresinde bolǵan jarylysqa qatysty isti tergeýge kedergi keltirdi dep aıyp taǵyldy. Qazaqstandyq stýdentterdiń kinási anyqtalatyn bolsa, onda olar tergeýge kedergi keltirgenderi úshin 20 jylǵa jáne sóz baılasqandary úshin 5 jylǵa bas bostandyqtarynan aıyrylýy, sonymen qatar 250 myń dollar aıyppul taǵylyp, 5 jylǵa deıin quqyq qorǵaý organdarynyń ashyq qadaǵalaýynda bolýy múmkin.
