AQSh baj salyǵyn kóterse, Qytaı qarsy shara qoldanady

ASTANA. KAZINFORM – AQSh tarıftik sharalaryn kúsheıtse, Qytaı óz quqyqtary men múddelerin qorǵaý úshin eń batyl qarsy sharalardy qabyldaıdy. Bul týraly búgin QHR Saýda mınıstrligi málim etti.

Xinhua agenttiginiń habarlaýynsha, bul málimdemeni QHR Saýda mınıstrliginiń ókili AQSh «Qytaı ımportyna qosymsha 50 paıyzdyq baj salyǵyn engizemiz» dep qorqytqannan keıin jasaǵan.

- Eger amerıkalyq tarap óz degenimen durys emes jolǵa tússe, Qytaı sońyna deıin kúresedi, - dep atap ótti vedomstvo ókili. 

QHR Saýda mınıstrligi AQSh-tyń Qytaıǵa qarsy salǵan «ózara tarıfteri» negizsiz jáne «birjaqty qorlaýdyń ádettegi tájirıbesi» dep sanaıdy.

- Qytaı qabyldaǵan qarsy sharalar onyń egemendigin, qaýipsizdigi men damý múddelerin qorǵaýǵa, sondaı-aq qalypty halyqaralyq saýda tártibin saqtaýǵa baǵyttalǵan, - delingen mınıstrlik habarlamasynda.

Ótken aptada Qytaı AQSh-tyń barlyq ónimderine 34% baj salyǵyn engizetinin jarııalady. Olar 10 sáýirde kúshine enedi.

- Qurama Shtattardan ákelinetin barlyq ımporttyq taýarlarǵa aǵymdaǵy tarıftik mólsherlemeden 34% joǵary tarıf salynady, - delingen QHR Memlekettik keńesiniń Tarıfter jónindegi komıssııasy qaýlysynyń málimdemesinde. 

Qytaıdyń bul qadamy AQSh-tyń tarıf saıasatyna jaýap boldy.

Buǵan deıin prezıdent Donald Tramp óziniń «Eń aldymen Amerıka» kún tártibiniń bir bóligi retinde AQSh-tyń barlyq saýda seriktesterine 10% baj salyǵyn jáne ondaǵan basqa elderge joǵary baj salyǵyn engizetinin jarııalady. 

9 sáýirden bastap AQSh 50% kóleminde qosymsha baj salyǵyn engizýdi kózdep otyr. Osylaısha, AQSh-tyń Qytaıǵa salynatyn tarıfteriniń jalpy somasy 104%-ǵa jetýi múmkin.

Buǵan deıin Qytaı AQSh-tyń barlyq ónimine 34% baj salyǵyn engizetinin jazǵan bolatynbyz.

Tramptyń sońǵy sheshiminen keıin jahandaný jaıy ne bolmaq – osy silteme arqyly oqı alasyz.