AQSh barlaýdyń shyǵyndary týraly birinshi ret esep berdi
ASTANA. Qazannyń 29-y. QazAqparat - AQSh bıligi barlaý qyzmetiniń shyǵyndary týraly tuńǵysh ret resmı málimetter berdi, dep habarlaıdy Vnews aqparat agenttigi.
Jarııalanǵan málimetterge sáıkes, 2010 jyly Ortalyq barlaý basqarmasy (OBB) men basqa agenttikterdiń jumysyn qosqanda, áskerı barlaýǵa qatysty emes shyǵyn 53,1 mıllıard dollardy quraǵan, al sáıkes maqsat úshin Pentagonǵa 27 mıllıard dollar bólingen.
AQSh-tyń barlaý qyzmetin qarjylandyrýǵa bólingen bıýdjettik aqshanyń jalpy kólemi osy jyly 80 mıllıard dollardan asyp túsken. Budan buryn barlaý shyǵyndary týraly málimetter ishinara jáne jarym-jartylaı ǵana beriletin, al qorǵanys mınıstrligi ózderine bólingen qarjy kólemin ashqan joq.
Áskerı áreketter aýqymynda is-qımyl jasaıtyn barlaý qyzmetteriniń barlyǵynyń ústinen qaraıtyn ulttyq barlaý dırektorynyń apparaty, sońǵy jyldary óziniń shyǵyndary týraly esep berip keledi.
Degenmen, ulttyq barlaý qyzmetiniń dırektory Dennıs Bler 2009 jyly jalpy shyǵynnyń bir bóligin ǵana jarııa etti. Jornalshylarmen suhbatynda ol atalǵan maqsat úshin 75 mlrd dollar jumsalǵanyn eske sala ketti.
Blerdiń ornyna kelgen barlaý qyzmetiniń jańa basshysy Djeıms Klepper (James Clapper) arnaıy qyzmetter ózderiniń shyǵyny týraly esep berýleri kerek, dep esepteıdi.
