AQSh barlaý qyzmeti koronavırýstyń qalaı paıda bolǵanyn málim etti
VAShINGTON. QazAqparat – AQSh Ulttyq barlaý qyzmeti koronavırýs ınfektsııasy qalaı paıda bolǵany jónindegi óz qorytyndysyn jarııalady. Bul týraly AQSh Barlaý qyzmeti dırektorynyń keńsesi habarlady.
Qujatta AQSh-tyń barlyq barlaý qoǵamdastyqtary COVID-19 vırýsy adam qolymen jasalmaǵany týraly keń taraǵan ǵylymı konsensýspen kelisetini jóninde aıtylǵan.
«Koronavırýs adam qolymen jasalmaǵan jáne genetıkalyq turǵyda jetildirilgen vırýs emes» delingen málimdemede.
Sondaı-aq, AQSh Ulttyq barlaý qyzmeti indettiń naqty qaıdan taraǵanyn anyqtaý úshin aqparattardy jáne barlaý málimetterin baqylap otyrmaq.
Qytaı bıligi 2019 jyly 31 jeltoqsanda Ýhan qalasynda pnevmonııa órshigeni týraly habarlady. Aýrý – koronavırýstyń jańa túri, oǵan COVID-19 degen resmı ataý berilgen.
Keıinirek, 11 naýryzda Dúnıejúzilik densaýlyq saqtaý uıymy bul indetti pandemııa dep jarııalady.
Álemde bul ınfektsııa 3,2 mln-nan astam adamda anyqtaldy. Al 1 mln-nan astam adam bul aýrýdan aıyǵyp ketti. 229 399 kisi kóz jumdy.
