AQSh bankteri JI arqyly jasalatyn aýqymdy kıbershabýyldarǵa daıyndalyp jatyr
ASTANA. KAZINFORM – AQSh-tyń iri qarjy uıymdary jasandy ıntellekt kómegimen jasalýy múmkin kıbershabýyldar onlaın-bankıng, aqsha aýdarymdary, bankomattar men tólem kartalarynyń jumysyna qaýip tóndirýi múmkin dep alańdap otyr.
JPMorgan Chase bankiniń basshysy Djeımı Daımonnyń aıtýynsha, qýatty jasandy ıntellekt modelderi paıda bolǵannan keıin kıberqaýip deńgeıi on ese artqan. Bul týraly Axios basylymy jazdy.
Onyń sózinshe, jasandy ıntellekt qaskóılerge qorǵanys júıelerindegi osal tustardy jyldam anyqtap, shabýyldardy avtomattandyrýǵa múmkindik beredi.
Avtonomdy JI-agentter de qaýip tóndiredi. Paıdalanýshylar olarǵa bank shottary men qupııasózderine qol jetkizýge ruqsat bere alady. AQSh bankteri mundaı baǵdarlamalardyń shot ıeleriniń tikeleı nusqaýynsyz áreket etken jaǵdaılarǵa tap bolǵan. Osyǵan baılanysty JPMorgan bógde JI-agentterin buǵattaı bastady.
Eýropalyq ortalyq bank iri bankterden 31 qazanǵa deıin kıbershabýyldardan qorǵaný josparyn ázirleýdi talap etti.
Aýqymdy shabýyl bolǵan jaǵdaıda klıentter bank shottaryna ýaqytsha qol jetkize almaı, aqsha aýdarý men satyp alǵan taýarlarynyń aqysyn tóleýde qıyndyqtarǵa tap bolýy múmkin. Eýropalyq odaqta bankter, ádette, klıenttiń kelisiminsiz esepten shyǵarylǵan aqshany qaıtarýǵa mindetti.
Eske sala ketsek, buǵan deıin Tramp «jasandy ıntellekt» termınine resmı túrde tyıym salatynyn málimdegen edi.
