AQSh B-52 bombalaýshylaryn Úndi muhıtyndaǵy bazaǵa ornalastyrdy

ASTANA. KAZINFORM – B-52 bombalaýshy ushaqtary Úndi muhıtynda bólek ornalasqan Dıego-Garsııa aralyna ushyp kelip, sol jerde B-2 bombalaýshylarymen birikti. Bul týraly Kazinform agenttiginiń menshikti tilshisi Air & Space Forces Magazine basylymyna silteme jasap habarlaıdy.

AQSh Áýe kúshteriniń ǵalamdyq soqqy berý qolbasshylyǵy ushaqtardyń ornalasqan jerine qatysty túsinikteme bergen joq.

«AQSh jaýyngerlik qolbasshylyqtarymen jáne tıisti memlekettik agenttikterimen úılesimde jahandyq operatsııalardy turaqty júrgizip otyrady. Bul áreketter AQSh pen onyń odaqtastaryna qarsy strategııalyq shabýyldardyń aldyn alý, olardy anyqtaý jáne qajet bolǵan jaǵdaıda toıtarý maqsatynda iske asyrylady. Operatsııalyq qaýipsizdikti saqtaý úshin oqý-jattyǵý nemese operatsııalar týraly egjeı-tegjeıli aqparat berilmeıdi», – delingen qolbasshylyq taratqan málimdemede.

Dıego-Garsııada ornalasqan bombalaýshylar Iemendegi hýsıt kóterilisshilerine qarsy áýe shabýyldaryna qatysqan. Alaıda atalǵan operatsııa 6 mamyrda aıaqtaldy, sebebi AQSh prezıdenti Donald Tramp hýsıtter Iemen jaǵalaýyndaǵy kommertsııalyq keme qatynasyna shabýyldy toqtatýǵa keliskennen keıin, AQSh olarǵa qarsy áýe soqqylaryn toqtatatynyn málimdedi.

Baqylaýshylar hýsıtterdiń shabýyldy toqtatatynyna kúmánmen qaraıdy. Sondyqtan AQSh bul aımaqta kelisimdi qamtamasyz etý úshin soqqy berýge qarýly kúshterin qaldyrýy múmkin.

Bombalaýshy jedel topty ornalastyrý mindetti túrde shabýyl operatsııalary bolatynyn bildirmeıdi. Kóbine ondaı ushqyshtar men ushaqtar oqý-jattyǵýlarǵa, odaqtastarmen birlesken jattyǵýlarǵa qatysady jáne AQSh avıatsııasynyń múmkindigin kórsetedi.

Buǵan deıin habarlaǵanymyzdaı AQSh-ta ushaq Qyzyl teńizde ornalasqan áýe tasymaldaǵyshyna qonýǵa árekettengen kezde qulap ketken, ushqyshtar jeńil jaraqat aldy. Bul týraly The New York Times jazǵan edi.

Eske salsaq, 4 mamyrda hýsıtter Tel-Avıvtegi Ben Gýrıon áýejaıyna shabýyl jasady.