AQSh, Ázerbaıjan jáne Armenııa TRIPP jobasy boıynsha tehnıkalyq toptar qurdy
ASTANA. KAZINFORM — AQSh, Ázerbaıjan jáne Armenııa úkimetteri «Halyqaralyq beıbitshilik pen órkendeý jolyndaǵy Tramp baǵyty» (TRIPP) jobasyn júzege asyrýdy jedeldetý maqsatynda úshjaqty tehnıkalyq toptardyń jumysyn bastady. Bul týraly Kazinform agenttiginiń Bakýdegi menshikti tilshisi AQSh Memlekettik departamentine silteme jasap habarlady.
Úsh el úkimetteriniń 6 qarashada jarııalaǵan málimdemesine sáıkes, AQSh Memlekettik hatshysynyń Eýropa jáne Eýrazııa máseleleri jónindegi kómekshisi Brendan Hanrahan, Armenııa syrtqy ister mınıstriniń orynbasary Vaan Kostanıan jáne Ázerbaıjan syrtqy ister mınıstriniń orynbasary Elnýr Mamedov TRIPP jobasyn ilgeriletýge baǵyttalǵan úshjaqty tehnıkalyq toptardyń jumysyn bastady.
— Bul format úsh eldiń saıası sheshim qabyldaıtyn ókilderi men tehnıkalyq mamandaryn biriktirip, óńirdegi uzaq merzimdi turaqtylyqty qamtamasyz etý, ekonomıkalyq belsendilikti arttyrý, aımaqtyq kommýnıkatsııalardy damytý jáne saýda-ekonomıkalyq órkendeýdi nyǵaıtý baǵytynda birlesip jumys isteýge múmkindik beredi. Bul yntymaqtastyq 2025 jylǵy 8 tamyzda Donald Tramptyń araǵaıyndyǵymen qabyldanǵan tarıhı Beıbitshilik sammıtiniń deklaratsııasynyń mańyzyn da aıqyndaıdy, — delingen málimdemede.
Alǵashqy kezeńde kólik jáne elektr energııasyn jetkizý baǵyttary boıynsha eki tehnıkalyq top qurý týraly kelisimge qol jetkizildi.
Atalǵan toptar kúrdeli tehnıkalyq máselelerdi sheshýmen, jobany iske asyrýdyń kelesi kezeńderine daıyndyqpen, sondaı-aq marshrýtty óńirdegi basqa ınfraqurylymdyq jelilermen biriktirýmen aınalysady.
Taraptar TRIPP jobasynyń barlyq quramdas bóligin barynsha qysqa merzimde júzege asyrýǵa beıildi ekenin taǵy da rastady.
Eske salaıyq, buǵan deıin Ázerbaıjan, Armenııa jáne AQSh beıbit kelisimderdi júzege asyrýǵa beıildi ekenin rastaǵanyn habarlaǵan edik.
