AQSh azamatynyń Mınnesotadaǵy ólimi: adam quqyqtarynyń buzylýy anyqtalǵan joq
ASTANA. KAZINFORM – AQSh Ádilet mınıstrligi Mınnesota shtatynda mıgranttardy ustaý operatsııasy kezinde qaza tapqan AQSh azamatyna qatysty adam quqyqtarynyń buzylýy boıynsha tergeý júrgizýge negiz joq ekenin málimdedi. Bul týraly Anadolu Ajansı habarlaıdy.
AQSh Ádilet mınıstriniń orynbasary Todd Blansh qazirgi ýaqytta azamattyq quqyqtardyń buzylýyna baılanysty tergeý bastaýǵa jetkilikti dálelder joq ekenin aıtty.
Eske salaıyq, oqıǵadan keıin Mınneapolıs qalasynda jappaı narazylyq aktsııalary bastalǵan. Qaıǵyly jaǵdaı Mınnesota shtatyndaǵy ımmıgratsııalyq qyzmettiń mıgratsııalyq zańnamany saqtaý jónindegi is-sharasy kezinde bolǵan.
AQSh bıliginiń málimetinshe, ımmıgratsııalyq qyzmettiń mamany avtokólikpen ózin qaǵyp ketpek boldy degen kúdikpen áıelge oq atqan. Oqıǵa Mınneapolıs qalasynda tirkelgen.
CBS telearnasynyń habarlaýynsha, qaza tapqan adam – 37 jastaǵy aqyn, jergilikti turǵyn, AQSh azamaty Rene Gýd.
Jergilikti BAQ derekterine sáıkes, ıntsıdent AQSh Immıgratsııa jáne keden qyzmetiniń (ICE) áreketterine qarsy ótip jatqan narazylyq aktsııasy kezinde bolǵan.
AQSh prezıdenti Donald Tramp marqum áıel ICE qyzmetkerine «sanaly jáne agressıvti túrde» kóligin baǵyttaǵanyn málimdedi.
Alaıda BBC jarııalaǵan beınejazbada kólikpen qaǵý sáti anyq baıqalmaıdy. Kýáger túsirgen vıdeoda ımmıgratsııalyq qyzmet ókilderi jol talǵamaıtyn kólikke jaqyndap, róldegi áıelge kólikten shyǵýdy buıyrǵany kórinedi. Agentterdiń biri júrgizýshi jaǵyndaǵy esiktiń tutqasyn tartady, al ekinshisi kóliktiń aldyńǵy bóliginde turady.
Dál osy sátte jol talǵamaıtyn kólik ornynan qozǵala bastaǵanda, agent oq atqan. Eki nemese úsh ret oq daýysy estilip, kóliktiń basqarýdan shyǵyp, jaqyn mańda turǵan avtokólikke soǵylǵany baıqalady.
Sársenbi jáne beısenbi kúnderi Mınneapolıs pen Mınnesotanyń ózge de qalalarynda ımmıgratsııalyq qyzmet pen Tramp ákimshiliginiń saıasatyna qarsy narazylyq sherýleri ótti. CBS jergilikti bólimshesiniń málimetinshe, ICE qyzmetkerleri sherýshilerge qarsy buryshty gaz qoldanyp, adamdardy kúshtep yǵystyrǵan.
Rene Gýdtyń qazasynan keıin shtatta jańa narazylyq aktsııalary bastaldy. Basylymdardyń jazýynsha, Mınneapolıste turǵyndar qaıǵyly oqıǵa bolǵan jerde ornatylǵan beıresmı memorıal mańyna jınalǵan.
Aıta keteıik, AQSh-ta shamamen 15 myń medbıke ereýilge shyqty.
