AQSh áýe tasymaldaýshy kemege jaqyndaǵan ırandyq drondy atyp túsirdi

ASTANA. KAZINFORM – AQSh pen Iran qatysýymen bolǵan birqatar oqıǵalar aıasynda óńirdegi jaǵdaı shıelenisken kúıinde qalyp otyr, dep habarlaıdy Kazinform agenttiginiń menshikti tilshisi.

Seısenbi kúni AQSh áskerı kúshteri Arabııa teńizinde Avraam Lınkoln áýe tasymaldaýshy kemesine jaqyndaǵan ırandyq ushqyshsyz ushý apparatyn atyp túsirdi. Bul týraly amerıkalyq resmı ókilge silteme jasap Reuters habarlady.

Málimetke sáıkes, ırandyq Shahed-139 drony áýe tasymaldaýshy keme baǵytyna qaraı ushyp bara jatqan. Ol kemeden kóterilgen F-35 joıǵysh ushaǵy arqyly joıylǵan.

U.S. Navy F-35C engaged and shot down an Iranian Shahed-139 drone over the northern Arabian Sea. https://t.co/bmcUzbHKlM pic.twitter.com/FzYQRtMM4K

— OSINTtechnical (@Osinttechnical) February 3, 2026

Keıinirek AQSh Ortalyq qolbasshylyǵy dronnyń «agressıvti túrde» jaqyndaǵanyn, onyń nıeti túsiniksiz bolǵanyn jáne halyqaralyq sýlarda áreket etip jatqan amerıkalyq kúshterdiń shıelenisti báseńdetý sharalaryna qaramastan, ushýyn jalǵastyrǵanyn málimdedi.

AQSh Ortalyq qolbasshylyǵynyń dereginshe, ushqyshsyz apparat Irannyń ońtústik jaǵalaýynan shamamen 800 shaqyrym qashyqtyqta bolǵan. Áskerı vedomstvo habarlamasynda amerıkalyq áskerı qyzmetkerlerdiń zardap shekpegeni jáne tehnıkanyń búlinbegeni atap ótildi.

AQSh áskerı ókilderiniń aıtýynsha, bul oqıǵa birneshe saǵat buryn bolǵan taǵy bir ıntsıdentten keıin tirkelgen. Ol jaǵdaıda Iran kúshteri Ormýz buǵazynda amerıkalyq tý astynda júrgen, ekıpajy AQSh azamattarynan quralǵan saýda kemesin qýǵan.

Áskerı málimdemege sáıkes, eki kater men ırandyq Mohadjer drony Stena Imperative tankerine joǵary jyldamdyqpen jaqyndap, kemege túsý jáne ony basyp alý qaýpin tóndirgen.

Atalǵan oqıǵa AQSh pen Iran arasyndaǵy kelissózder qarsańynda oryn aldy. Kelissózder osy aptada ótýi tıis, bul rette óńirde amerıkalyq áskerı qatysý kúsheıtilgen.

Buǵan deıin Iran Islam revolıýtsııasy saqshylar korpýsy Ormýz buǵazynda 1 aqpannan bastap eki kúndik atys qoldanylatyn áskerı-teńiz oqý-jattyǵýyn ótkizetinin habarlaǵan bolatyn.

AQSh Qarýly kúshteriniń Ortalyq qolbasshylyǵy Iran KSIR-in jarııalanǵan oqý-jattyǵýlardy qaýipsiz ári kásibı deńgeıde ótkizýge jáne teńizdegi shıelenisti ýshyqtyrmaýǵa shaqyrdy.

Aıta keteıik, buǵan deıin Iran prezıdenti osy aptada Túrkııa aýmaǵynda ótýi múmkin kelissózderge daıyndyq júrgizýge ruqsat bergeni habarlanǵan edi.