AQSh bes jyl ishinde 4,3 myńǵa jýyq JASSM zymyranyn satyp almaq
ASTANA. KAZINFORM – AQSh Áýe kúshteri aldaǵy bes jylda Lockheed Martin kompanııasynan shamamen 4,3 myń dana JASSM-ER qanatty zymyranyn satyp alýdy josparlap otyr. Bul qarý-jaraq Iranmen bolǵan soǵys kezinde jumsalǵan qordy tolyqtyrý úshin qajet, dep habarlaıdy Bloomberg agenttigi.
Agenttiktiń málimetinshe, JASSM-ER zymyranynyń ushý qashyqtyǵy shamamen 900 shaqyrymdy quraıdy.
Amerıkalyq áskerı qurylymdar bul satyp alýlardy 2031 jylǵa deıin jalǵastyrýdy kózdep otyr. Sonymen qatar kelesi qarjy jylynan bastap AQSh Áýe kúshteri jetkizilim kólemin shamamen alty esege arttyrmaq. Máselen, osy qarjy jylynda 144 zymyran satyp alynsa, kelesi jyly bul kórsetkish 821-ge deıin ósedi. Al 2028 jyly 900 birlikke jetýi tıis.
Pentagon 2031 jylǵa qaraı óz qorynda 11 myń JASSM-ER zymyrany bolýyn maqsat etip otyr.
Osy aptada AQSh Kongresi Ókilder palatasynyń múshesi Pat Ryan Iranmen soǵystyń alǵashqy tórt aptasynda AQSh 1 myńnan astam JASSM zymyranyn paıdalanǵanyn málimdedi. Onyń aıtýynsha, bul atalǵan qarý túri boıynsha amerıkalyq arsenaldyń shamamen 20 paıyzyna teń.
Aıta keteıik, AQSh óz azamattaryn Irannan shuǵyl túrde ketýge shaqyrdy.
