AQSh astanasynda qoǵamdyq qaýipsizdik salasynda tótenshe jaǵdaı engizildi: 465 adam ustaldy

ASTANA. KAZINFORM — Aq úı Vashıngtonda «qoǵamdyq qaýipsizdik salasynda tótenshe jaǵdaı» aıasynda júrgizilgen operatsııalar barysynda 465 adamnyń ustalǵanyn habarlady. Tótenshe jaǵdaı el astanasynda qylmys deńgeıin tómendetý maqsatynda engizilgen, dep habarlaıdy Anadoly. 

Aq úıdiń baspasóz hatshysy Kerolaın Lıvıtt el astanasynda Ulttyq gvardııa jumyldyrylǵanyn jáne júrgizilip jatqan operatsııalardyń «zorlyq-zombylyq qylmystarymen kúreske baǵyttalǵanyn» málimdedi.

Onyń aıtýynsha, osy ýaqytqa deıin 465 adam ustalǵan, onyń ishinde keshe ustalǵan 52 adam, sonyń ishinde Salvadordan shyqqan MS-13 bandalyq top múshesi bar.

Sondaı-aq Lıvıtttiń habarlaýynsha, astanadaǵy kóshelerde qonystanǵan baspanasyzdarǵa tıesili 48 shatyrly lager joıylǵan, bul baǵyttaǵy sharalar jalǵasatyn bolady.

Ustalǵandar arasynda pyshaq qoldanýmen jasalǵan shabýyldar, kisi óltirý, kisi óltirýge áreket etý, federaldyq quqyq qorǵaý organdarynyń qyzmetkerlerine shabýyl jasaý sııaqty aýyr qylmystar boıynsha orderi bar tulǵalar bar ekeni aıtyldy.

Vashıngtonda tótenshe jaǵdaı jarııalandy

2025 jylǵy 11 tamyzda AQSh prezıdenti Donald Tramp qylmys deńgeıin tómendetý maqsatynda Vashıngtonda «qoǵamdyq qaýipsizdik salasynda tótenshe jaǵdaı» jarııalap, astanalyq polıtsııany federaldyq baqylaýǵa alatynyn jáne qalaǵa Ulttyq gvardııa áskerin kirgizetinin málimdegen.

AQSh Ádilet mınıstrligi Esirtkimen kúres basqarmasynyń (DEA) jetekshisi Terrı Koýldy «tótenshe jaǵdaı kezindegi polıtsııa komıssary» etip taǵaıyndady.

Óz kezeginde AQSh Qorǵanys mınıstrligi (Pentagon) 14 tamyzda astanaǵa 800 Ulttyq gvardııa jaýyngeriniń jiberilgenin habarlady.

Sonymen qatar respýblıkalyqtar baqylaýyndaǵy Batys Vırdjınııa, Ońtústik Karolına jáne Ogaıo shtattary tótenshe jaǵdaı jaǵdaıynda aımaqqa júzdegen Ulttyq gvardııa áskerin jiberý týraly sheshim qabyldady.