AQSh áskerıleri Grenlandııany satyp alýy múmkin

ASTANA. KAZINFORM  - Aq úı Grenlandııany satyp alý «ulttyq qaýipsizdik basymdyǵy» ekenin jáne bul maqsatqa jetý úshin AQSh áskerı kúshterin paıdalaný qarastyrylyp jatqanyn málimdedi, dep habarlaıdy NBC News. 

- Prezıdent Tramp Grenlandııany satyp alý Qurama Shtattardyń ulttyq qaýipsizdiginiń basymdyǵy ekenin jáne Arktıka aımaǵyndaǵy qarsylastarymyzǵa toıtarys berý óte mańyzdy ekenin anyq bildirdi, - dep málimdedi baspasóz hatshysy Kerolaın Lıvıtt.

- Prezıdent jáne onyń komandasy osy mańyzdy syrtqy saıasat maqsatyna jetýdiń birqatar nusqasyn talqylap jatyr jáne árıne, AQSh áskerı kúshterin paıdalaný árdaıym Bas qolbasshynyń qaramaǵynda qalyp otyr, - delingen málimdemede.

Aq úıdiń bul málimdemesi Danııany qosa alǵanda, eýropalyq negizgi odaqtastardyń birlesken málimdemesinde Grenlandııanyń egemendigi men aýmaqtyq tutastyǵynyń qundylyqtaryn «qorǵaýdy toqtatpaıtynyn» málimdegennen keıin kóp uzamaı jasaldy.

Aq úıdiń joǵary laýazymdy ókili NBC News arnasyna bergen suhbatynda qarastyrylyp jatqan nusqalar arasynda aýmaqty Danııadan satyp alý nemese aralmen erkin qaýymdastyq týraly kelisimge qol qoıý kiretinin málimdedi.

AQSh úkimeti osyndaı kelisimder Marshall araldary Respýblıkasymen, Mıkronezııa Federatıvtik Shtattarymen jáne Palaý Respýblıkasymen jasasty. Bul kelisimder AQSh-tyń sol jerde qaýipsizdik kúshterin ornalastyrýǵa ruqsaty úshin qarjylyq kómek kórsetýin qarastyryp otyr.

Buǵan deıin Aq úıdiń aǵa keńesshisi Stıven Mıllerdiń áıeli Ketı Mıllerdiń X áleýmettik jelisinde Grenlandııa kartasyn Amerıka týynyń tústerimen boıap, «Jaqynda» degen jazýy bar jazba jarııalaǵany habarlanǵan bolatyn.

Óz kezeginde Danııa Tramp ákimshiligin qoqan-loqqy kórsetýdi doǵarýǵa shaqyrdy.