AQSh áskerı kúshteri «Islam memleketi» múshelerin Sırııadan Irakqa tasymaldaýdy bastady

ASTANA.KAZINFORM - AQSh Ortalyq qolbasshylyǵy ustalǵan 7000-ǵa jýyq «Islam memleketiniń» (IM, Qazaqstanda tyıym salynǵan uıym – red.) sodyrlary Sırııadan Irakqa tasymaldanýy múmkin ekenin málim etti, dep habarlaıdy NBC News.

150 «Islam memleketi» múshesinen turatyn alǵashqy top Sırııanyń soltústik-shyǵysyndaǵy Hasaka provıntsııasynan Iraktaǵy qaýipsiz jerlerge jiberildi.

Buǵan AQSh qoldaǵan Sırııa demokratııalyq kúshteri (SDF) men Sırııa úkimetiniń dúısenbi kúni Irak shekarasyna jaqyn ornalasqan Ál-Shaddadı túrmesinen IM músheleriniń qashyp ketýine qatysty bir-birine taǵylǵan aıyptaýlar sebep boldy.

Kúrdter basqaratyn SDF áli de shamamen 9000 IM múshesin ustaıtyn onnan astam túrmeni basqarady. IM 2017 jyly Irakta jáne 2019 jyly Sırııada jeńilgenimen, terrorıstik top aımaq úshin áli de qaýipti sanalady, sebebi eki el de shabýyl jasaýdy jalǵastyryp keledi.

AQSh-tyń Sırııadaǵy elshisi Tom Berrak Sırııa demokratııalyq kúshteriniń IM-ge qarsy kúrestegi róli negizinen taýsylǵanyn, sebebi Damask endi qaýipsizdik úshin jaýapkershilikti óz moınyna alýǵa daıyn ​​ekenin málimdedi.

Sırııa Syrtqy ister mınıstrligi IM ustaý oryndaryn bılikke tapsyrýdy quptap, ony qaýipsizdik pen turaqtylyqty nyǵaıtýdaǵy mańyzdy qadam dep atady.

Sırııa lagerlerinde shamamen 24 000 adam, negizinen IM músheleriniń áıelderi men balalary qalǵany atalyp ótti. Olardyń arasynda shamamen 14 500 sırııalyq jáne 3000 Irak azamaty bar. Álemniń túkpir-túkpirinen taǵy 6500 azamat ekstremıstik topqa qosyldy.

Buǵan deıin Sırııa úkimeti men kúrdter atysty toqtatý týraly kelisimge qol qoıǵan bolatyn.