AQSh áskerı kúshteri Gazada bolmaıdy

ASTANA. KAZINFORM – AQSh Qarýly kúshteriniń Ortalyq qolbasshylyǵynyń basshysy (CENTCOM) admıral Bred Kýper Gaza sektoryna baryp qaıtqan soń amerıkalyq áskerlerdiń beıbit kelisim talaptarynyń oryndalýyn qadaǵalaý úshin palestınalyq anklavqa ornalastyrylmaıtynyn rastady, dep habarlaıdy reseılik TASS.

- Men Gazadan CENTCOM basshylyǵymen Azamattyq-áskerı yntymaqtastyq ortalyǵyn qurý jumystary týraly habarlaý úshin keldim. Ortalyq shıelenisten keıin jaǵdaıdy turaqtandyrý jumystaryna qoldaý kórsetý úshin barlyq qyzmetterdiń jumysyn úılestiredi. Bul sharttardyń barlyǵy Gazada amerıkalyq áskerlersiz júzege asyrylady,- delingen Kýperdiń CENTCOM-nyń H paraqshasyndaǵy jazbasynda.

Fox News telearnasynyń tilshisi Djennıfer Grıffınniń málimetterinshe, kelisim boıynsha áskerdiń shyǵarylyp jatqanyna kóz jetkizý úshin Kýpermen birge Izraıldiń Gazadaǵy áskerı bazasyna AQSh prezıdentiniń arnaıy elshisi Stıven Ýıtkoff ta barǵan.

Ekeýi de Izraılge oraldy, dep jazdy ol H paraqshasynda.

Osyǵan deıin Aq úıdiń baspasóz hatshysy Kerolaın Lıvıtt Gaza sektoryndaǵy atysty toqtatý týraly kelisim talaptarynyń oryndalýyn halyqaralyq mıssııa aıasynda Taıaý Shyǵysqa jiberilgen 200-ge deıingi AQSh áskeri júzege asyratynyn aıtqan.

Reuters agenttiginiń habarlaýynsha, halyqaralyq mıssııa quramyna Mysyr, Qatar, Túrkııa áskerleri kirgen, sondaı-aq Birikken Arab Ámirlikteriniń áskerleri de kirýi múmkin.

Osyǵan deıin Gazadaǵy atysty toqtatý kelisimi kúshine engeni týraly jazdyq.