AQSh áskerı kúshteri «esirtki lańkesteriniń» bes kemesine taǵy soqqy jasady
ASTANA. KAZINFORM — AQSh áskerı kúshteri esirtki tasymalymen aınalysatyn taǵy bes kemege shabýyl jasaǵanyn málimdedi. Segiz adam qaza tapty, dep habarlady NBC News.
30 jeltoqsanda AQSh áskerı kúshteri esirtki tasymalymen aınalysatyn dep shamalanǵan úsh kemege soqqy jasap, saldarynan úsh adam qaza tapty.
31 jeltoqsanda taǵy eki kemege shabýyl jasalyp, bir kemede úsh adam, ekinshi kemede eki adam opat boldy. AQSh qarýly kúshteriniń qolbasshylyǵy olardy «esirtki lańkesteri» dep atady.
— Kemeler esirtki tasymalynyń belgili joldarymen júrip, esirtki saýdasymen aınalysqan, — delingen AQSh Ońtústik qolbasshylyǵynyń áleýmettik jelilerdegi jazbasynda.
On Dec. 31, at the direction of @SecWar Pete Hegseth, Joint Task Force Southern Spear conducted a lethal kinetic strike on two vessels operated by Designated Terrorist Organizations. Intelligence confirmed the vessels were transiting along known narco-trafficking routes and… pic.twitter.com/4AE5u4cEff
— U.S. Southern Command (@Southcom) January 1, 2026
Soqqylardyń naqty qaı jerde jasalǵany, sondaı-aq shabýyldarǵa deıin keme borttarynda bolǵan adamdardyń naqty sany atalmaǵan.
Málimdemede sondaı-aq shabýyldardan keıin AQSh jaǵalaý kúzetine izdeý-qutqarý operatsııalaryn bastaý qajettiligi týraly eskertilgeni habarlandy.
2025 jyldyń qyrkúıeginen bastap AQSh Karıb teńizi men Tynyq muhıtynyń shyǵysynda esirtki tasymaldady degen kúdikke ilingen kem degende 35 kemege soqqy berdi, saldarynan 100-den astam adam qaza tapty.
Eske sala ketsek, buǵan deıin Donald Tramp AQSh-tyń esirtki kartelderine qarsy soǵys bastaǵanyn jarııalaǵan bolatyn.