AQSh áskerı qyzmetshilerin testosteron tapshylyǵyna mindetti tekserý ýaqytsha toqtatyldy
ASTANA.KAZINFORM - AQSh Qorǵanys mınıstrligi áskerı qyzmetshilerdi testosteron tapshylyǵyna mindetti túrde tekserýdi kózdeıtin jýyrda jarııalanǵan usynymdardy ýaqytsha qaıtaryp aldy, dep habarlaıdy Kazinform agenttigi.
Qujat 2 qyrkúıekte jarııalanǵanymen, kelesi kúni-aq vedomstvonyń saıtynan óshirildi. Reuters agenttiginiń habarlaýynsha, amerıkalyq sheneýniktiń sózinshe, usynymdar jańartý engizý úshin qaıtarylǵan. Bul rette ýaqytsha erejeler kúshinde qalady.
Pentagon men Qorǵanys densaýlyǵy agenttiginiń saıttarynda qujat pen málimdemege berilgen siltemelerdi ashqan kezde «Page Not Found» («Bet tabylmady») degen habarlama shyqqan.
Áskerı qyzmetshilerdi testosteron deńgeıine mindetti túrde tekserý bastamasyn shilde aıynda AQSh Qorǵanys mınıstri Pıt Hegset jarııalaǵan bolatyn. Ol buǵan deıin testosterondy keńinen qoldanýdy qoldaǵan.
Qujattyń bastapqy nusqasyna sáıkes, 30 jastan asqan er adamdar saýalnama toltyrýy kerek bolǵan. Onyń nátıjesine qaraı olarǵa qandaǵy testosteron deńgeıin anyqtaý úshin qan taldaýy taǵaıyndalýy múmkin edi. Testosteron tapshylyǵy anyqtalǵan jaǵdaıda gormondyq terapııa qoldaný múmkindigi qarastyrylǵan.
Áıelder úshin gormondyq jaǵdaıdy jáne onymen baılanysty buzylystardy baǵalaýdyń jeke tártibi qarastyrylǵan.
Tekserýler áskerı qyzmetshilerdi jyl saıynǵy medıtsınalyq qarap-tekserý aıasynda júrgizilýi tıis bolǵan.
Pentagon baǵdarlamanyń maqsaty amerıkalyq áskerı qyzmetshilerdiń jaýyngerlik ázirligin arttyrý ekenin málimdegen. Turaqty medıtsınalyq tekserý gormondyq buzylystardy jáne aǵzaǵa energııanyń jetkiliksiz túsýine baılanysty máselelerdi anyqtaýǵa, sondaı-aq der kezinde em taǵaıyndaýǵa múmkindik beredi dep boljanǵan.
Alaıda bul bastama medıtsına mamandarynyń arasynda suraq týǵyzdy. Olardyń aıtýynsha, mundaı baǵdarlamanyń armııanyń jaýyngerlik ázirligin arttyratynyn dáleldeıtin derek ázirge jetkiliksiz.
Sonymen qatar keıbir dárigerler tekserý ıdeıasyn qoldady. Olardyń pikirinshe, mundaı tekserýler áskerı qyzmetshilerdiń densaýlyǵyndaǵy basqa da kúrdeli, biraq jasyryn máselelerdi anyqtaýǵa kómektesýi múmkin.
Osyǵan deıin AQSh senatorlary polıtsııanyń elektroshoker qolǵaptaryn qoldaný týraly josparyn synaǵan bolatyn.
