AQSh áskerı qyzmetkerleri 15 qarashadan bastap jalaqysyz qalýy múmkin
ASTANA. KAZINFORM — AQSh-ta federaldyq úkimettiń qarjylandyrýynyń ýaqytsha toqtatylýy (shatdaýn) jalǵasqan jaǵdaıda, 15 qarashadan bastap amerıkalyq áskerı qyzmetkerler jalaqy almaı qalýy múmkin. Bul týraly TASS agenttigi jazdy.
Bul týraly eldiń qarjy mınıstri Skott Bessent CBS News telearnasynyń efırinde málimdedi.
Ol Donald Tramptyń qazirgi ákimshiliginiń ustanymyn atap ótip, shatdaýn úshin jaýapkershilik Demokratııalyq partııadaǵy saıası qarsylastarda ekenin jetkizdi. Bessenttiń aıtýynsha, Kongrestegi demokrattar kóshbasshylaryn memlekettik qyzmetkerler men áskerı qyzmetshilerdiń taǵdyrynan góri kelesi jylǵy aralyq saılaýlar kóbirek tolǵandyrady.
— Biz aıdyń ortasynda Pentagon bıýdjetiniń qalǵan qarjysy esebinen áskerı qyzmetkerlerdiń jalaqysyn tóleýimiz múmkin jáne muny qarashanyń basynda júzege asyrýǵa tyrysamyz. Alaıda 15 qarashaǵa qaraı el úshin ómirin qııýǵa daıyn sarbazdar eńbekaqysyz qalýy yqtımal, — dedi mınıstr.
Eske sala ketsek, federaldyq úkimettiń ishinara jumysyn toqtatýy 1 qazannan bastap kúshine endi. Bul qarjylandyrýdyń toqtaýyna baılanysty týyndady. Sebep — respýblıkalyqtar men demokrattar arasynda birqatar bıýdjet baptary, sonyń ishinde densaýlyq saqtaý shyǵyndary boıynsha kelisimniń bolmaýy. Qos partııa ókilderi shatdaýnnyń uzaqqa sozylýy úshin birin-biri saıası maqsat kózdep aıyptap otyr.
AQSh zańnamasyna sáıkes, ulttyq qaýipsizdik pen syrtqy saıasatqa jaýapty mınıstrlikter men vedomstvolar qarjylandyrý toqtaǵan kezde de jumysyn jalǵastyra beredi. Sol sııaqty «adam ómiri men múlkin qorǵaýǵa» qatysty mindet atqaratyn memlekettik qyzmetkerler de óz jumysyn toqtatpaıdy. Mundaı qyzmetkerler, ádette, jalaqysyz eńbek etedi, al eńbekaqy bıýdjet máselesi sheshilgen soń keıin tólenedi.
1977 jyldan beri AQSh federaldyq úkimetiniń qarjylandyrýy ákimshilik pen Kongress arasyndaǵy kelispeýshilikter saldarynan 20-dan astam ret toqtaǵan. Eń uzaq shatdaýn 2018 jylǵy 22 jeltoqsannan 2019 jylǵy 25 qańtarǵa deıin — Tramptyń birinshi prezıdenttik merzimi kezinde 35 kúnge sozylǵan.
Eske sala ketsek, 22 kún AQSh tarıhyndaǵy ekinshi eń uzaq shatdaýn boldy.
Sondaı-aq AQSh-tyń memlekettik qaryzy alǵash ret 38 trln dollardan asqanyn jazdyq.