AQSh áskerı bazalary elektr qýaty men sýǵa táýelsiz jumys isteýge kóshedi
ASTANA. KAZINFORM — AQSh Qorǵanys mınıstrligi aýqymdy áskerı qaqtyǵys týyndaǵan jaǵdaıda eldegi iri áskerı bazalardyń keminde 90 kún boıy derbes jumys isteýin qamtamasyz etýge daıyndalyp jatyr. Bul týraly Anadolu agentti jazdy.
Fox News málimetinshe, daıyndyq jumystary FORTRESS bastamasy aıasynda júrgizilip jatyr. Onyń maqsaty — azamattyq ınfraqurylymda aqaýlar týyndaǵan jaǵdaıda da áskerı nysandardyń úzdiksiz jumys isteýin qamtamasyz etý.
Josparǵa sáıkes, AQSh-tyń qurlyqtyq bóligindegi iri áskerı bazalar keminde 90 kún boıy elektr energııasymen, sýmen, otynmen jáne baılanyspen óz betinshe qamtamasyz etilýi tıis.
Baǵdarlama aıasynda Pentagon qarý-jaraq pen otynnyń strategııalyq qoryn jasaqtaýdy, balama jetkizý tizbekterin qurýdy jáne daǵdarys kezinde azamattyq kásiporyndardy qorǵanys ónimderin shyǵarýǵa beıimdeý múmkindigin qarastyryp otyr.
Budan bólek, mobıldi ıadrolyq reaktorlardy, energııany saqtaýǵa arnalǵan iri akkýmýlıatorlyq júıelerdi jáne jergilikti elektr jelilerin paıdalaný josparlanǵan. Bul tehnologııalar azamattyq elektr jelilerinen uzaq ýaqytqa ajyratylǵan jaǵdaıda da áskerı nysandardyń jumysyn jalǵastyrýǵa múmkindik beredi.
Pentagon ókili Shon Parnell Anadolu agenttigine bergen túsiniktemesinde ulttyq qorǵanystyń azamattyq ınfraqurylymǵa táýeldi bolýy eleýli qaýip tóndiretinin atap ótti.
«Ulttyq qorǵanysty qamtamasyz etý kezinde qarapaıym azamattyq ınfraqurylymǵa táýeldi bolǵymyz kelmeıdi. Biz mundaı táýekelge bara almaımyz. Bul — jol berýge bolmaıtyn qaýip», — dedi ol.
Parnell FORTRESS bastamasyn AQSh-tyń qorǵanys qabiletin saqtaýǵa arnalǵan ózindik saqtandyrý tetigine teńedi. Onyń aıtýynsha, elektr energııasynyń úzilýi baılanys júıeleriniń, sýmen jabdyqtaýdyń, logıstıkanyń jáne áskerı basqarý organdarynyń jumysyna kedergi keltirýi múmkin.
Ol buǵan deıin AQSh-tyń qorǵanys tujyrymdamasy eldiń eki muhıttyń arasynda ornalasýyna, ıaǵnı geografııalyq artyqshylyǵyna edáýir dárejede súıengenin aıtty. Alaıda qazirgi zamanǵy qaýip-qaterler bul tásildi qaıta qaraýdy talap etedi.
Osy oraıda Pentagon ókili AQSh prezıdenti Donald Tramptyń Grenlandııaǵa, Panamaǵa jáne Batys jartysharǵa qatysty máselelerge nazar aýdarǵanyn, sondaı-aq «Altyn kúmbez» dep atalatyn ulttyq zymyranǵa qarsy qorǵanys júıesin qurý josparyn atap ótti.
Buǵan deıin AQSh Taıaý Shyǵys bazalaryndaǵy áskerin azaıtyp jatqanyn jazdyq.
