AQSh áskeri Tynyq muhıtynda esirtki tasyǵan tórt kemege soqqy jasady

ASTANA. KAZINFORM – AQSh-tyń Qorǵanys mınıstri Pıter Hegset Tynyq muhıtynda esirtki tasymaldady dep kúdik keltirilgen tórt kemege shabýyl jasalǵanyn, nátıjesinde kemelerdegi 15 adamnyń 14-i qaza tapqanyn aıtty, dep habarlaıdy Anadoly. 

Hegset amerıkalyq X áleýmettik jelisinde jarııalaǵan málimdemesinde Tynyq muhıtynda AQSh-qa kóp mólsherde esirtki jetkizdi dep boljanǵan tórt kemeniń atqylanǵan sáti túsirilgen beınejazbalarmen bólisti.

Mınıstrdiń aıtýynsha, bul shabýyldar AQSh prezıdenti Donald Tramptyń buıryǵymen júzege asqan.

— AQSh Qorǵanys mınıstrligi Tynyq muhıttyń shyǵys bóliginde esirtki tasymalymen aınalysqan jáne terrorıstik uıymdar basqaryp otyrǵan tórt kemege soqqy jasady, — dedi ol.

Hegset bul kemelerdiń AQSh barlaý qyzmeti arqyly baqylanǵanyn jáne olardyń «esirtki tasymaldaýdyń belgili baǵyttarymen júzip, esirtki alyp júrgenin» aıtty.

Onyń sózinshe, shabýyldar halyqaralyq sýda bolǵan, amerıkalyq sarbazdar arasynda shyǵyn joq.

— Úsh soqqy nátıjesinde 14 esirtkimen aınalysqan terrorıst qaza tapty, bir adam tiri qaldy, — dedi mınıstr.

Sondaı-aq Hegset AQSh Qorǵanys mınıstrligi «20 jyldan astam ýaqyt boıy ózge elderdiń jerin qorǵaǵanyn», endi «óz otanyn qorǵaýǵa kiriskenin» atap ótti.

Mınıstrdiń aıtýynsha, bul toptyń músheleri elge esirtki kirgizý arqyly «Al-Kaıda» terrorlyq uıymynan da kóp amerıkalyqtyń ómirin qıǵan, sondyqtan olar dál sol uıymǵa qarsy qoldanylǵan sharalarmen birdeı áreketke ushyraıdy. 

Aıta ketelik AQSh Venesýela jaǵalaýynda esirtki tasymaldaýshylardyń kemesine soqqy jasaǵan edi.