AQSh áskeri Sırııadaǵy qarý qoımasyn bombalady

ASTANA.KAZINFORM - AQSh qarýly kúshteri Sırııadaǵy Iran qoldaıtyn sodyrlar tobynyń qarý-jaraq qoımasyna soqqy berdi. Bul Sırııanyń soltústik-shyǵysyndaǵy amerıkalyq bazaǵa jasalǵan zymyran shabýylynan keıingi ekinshi operatsııa, dep habarlaıdy Kazinform-nyń menshikti tilshisi.

AQSh áskerı kúshteriniń habarlaýynsha, áýe shabýyly Shaddadı patrýldik bazasyna jasalǵan zymyran shabýylyna jaýap retindegi bolǵan. Shabýyl kezinde amerıkalyq nysandarǵa eshqandaı zııan kelmegen.

Taıaý Shyǵysta ornalastyrylǵan amerıkalyq kúshterge jaýap beretin AQSh Qarýly kúshteriniń ókildigi bombalanǵan aýmaq «Iranmen baılanysty toptyń qarý-jaraq jáne logıstıka qoımasynyń shtab-páteri» dep túsindirdi.

CENTCOM málimetinshe, aty-jóni atalmaǵan sodyrlar Sırııanyń soltústik-shyǵysyndaǵy Haseke provıntsııasyndaǵy AQSh-tyń Shaddadı patrýldik bazasyn zymyranmen atqylaǵan. Soqqy nysanǵa zaqym keltirmedi.

Ulybrıtanııada ornalasqan Syrian Observatory for Human Rights baqylaý tobynyń málimetinshe, AQSh-tyń atalǵan áýe soqqylarynan Iran qoldaıtyn qarýly toptardyń 4 sırııalyq múshesi qaza taýyp, 10 adam jaraqat aldy.

Aıta keteıik, Qazaqstan astanasynda Sırııadaǵy jaǵdaıdy retteý boıynsha Astana protsesi aıasyndaǵy halyqaralyq kelissózderdiń 22-shi kezeńi aıaqtaldy.