AQSh áskeri qaýipsizdikke baılanysty BYD kólikterine tyıym saldy
ASTANA. KAZINFORM — AQSh áskerıleri Japonııanyń Okınava prefektýrasynda ornalasqan Kadena áýe bazasynda qytaılyq BYD kompanııasynyń avtokólikterin paıdalanýǵa tyıym saldy, dep habarlaıdy Kyodo agenttigi.
Mundaı shekteý kólik kameralary men datchıkteri áskerı nysan aýmaǵynda aqparat jınaýǵa qoldanylýy múmkin degen qaýipke baılanysty engizilgen.
Bul sheshim týraly 26 qazanda Kadena bazasynda ornalasqan AQSh Áskerı-áýe kúshteriniń 18-shi avıaqanaty habarlady. Bólim ókili, podpolkovnık Allı Stormer atalǵan kólikter áskerı qyzmetshilerdiń qaýipsizdigi men áskerı mindetterdiń oryndalýyna qater tóndirýi múmkin ekenin málimdedi. Alaıda ol naqty qandaı qaýip baryn ashyp aıtpady.
Yonhap agenttiginiń málimetinshe, atalǵan shekteýler Ońtústik Koreıadaǵy jáne basqa elderdegi AQSh áskerı bazalarynda da engizilýi múmkin.
Kadena áýe bazasy — AQSh-tyń Azııa-Tynyq muhıty aımaǵyndaǵy strategııalyq mańyzy bar áskerı nysandarynyń biri.
AQSh-tyń mundaı sheshim qabyldaýyna zamanaýı avtokólikter arqyly derekter jınalady degen qaýip sebep bolǵan. Óıtkeni kólikterge ornatylǵan kameralar, datchıkter men ózge de elektrondyq júıeler aınaladaǵy ahýal, sonyń ishinde áskerı nysandardyń mańy týraly aqparat jınaýy múmkin.
Buǵan deıin Pentagon qupııa aqparat taralýyna baılanysty áskerı shendilerdi polıgraftan ótkizgeni habarlanǵan bolatyn.
