AQSh áskeri Irandaǵy nysandarǵa kezekti ret soqqy jasady
ASTANA. KAZINFORM – AQSh Qarýly kúshteri Irandaǵy nysandarǵa qarsy jańa áskerı operatsııa bastaǵanyn málimdedi. Vashıngtonnyń málimetinshe, bul shara Tegerannyń Ormýz buǵazyndaǵy keme qatynasyna kedergi keltirý múmkindigin shekteýge baǵyttalǵan, dep habarlaıdy DW.
AQSh Qarýly kúshteriniń Ortalyq qolbasshylyǵy (CENTCOM) X áleýmettik jelisinde jarııalaǵan málimdemesinde soqqy jasaý týraly buıryqty AQSh prezıdenti Donald Tramptyń ózi bergeni aıtyldy. Áskerıler jańa shabýyldardyń naqty qandaı nysandarǵa baǵyttalǵanyn jarııalaǵan joq.
Bir kún buryn CENTCOM Ormýz buǵazyndaǵy saýda kemelerine jasalǵan shabýyldarǵa jaýap retinde Irandaǵy 80-nen astam nysanǵa soqqy bergenin habarlaǵan edi.
AQSh áskeri Irannyń áýe qorǵanysy júıelerin, basqarý jáne baılanys jelilerin, jaǵalaýdaǵy radıolokatsııalyq qondyrǵylaryn, kemege qarsy zymyran keshenderin, sondaı-aq Islam revolıýtsııasy saqshylar korpýsynyń (KSIR) 60-tan astam katerin nysanaǵa alǵan.
Jańa shabýyldar týraly habarlanar aldynda Vashıngton eki aptadan sál astam ýaqyt buryn toqtatylǵan Iran munaıyna qatysty sanktsııalardy qaıta kúshine engizdi.
AQSh soqqylarynan keıin Iran bıligi Vashıngtondy Ormýz buǵazyndaǵy erkin keme qatynasy týraly memorandýmnyń besinshi tarmaǵyn buzdy dep aıyptady.
Iran Syrtqy ister mınıstrliginiń ókili Ismaıl Bagaıdiń aıtýynsha, AQSh birjaqty áreketteri men Iranǵa qarsy agressııalyq qadamdary arqyly kelisimdi is júzinde buzǵan.
– Iran óziniń egemendigi men ulttyq múddesin qorǵaý úshin barlyq qajetti sharany qabyldaıdy, – dep jazdy ol X áleýmettik jelisinde.
Iran buqaralyq aqparat quraldarynyń habarlaýynsha, Tegeran AQSh-tyń alǵashqy soqqylaryna jaýap sharalaryn jarııalady.
Kýveıt pen Bahreın de Iran tarapynan atqylaý bolǵanyn habarlady. Bul shabýyldar úshin jaýapkershilikti Islam revolıýtsııasy saqshylar korpýsy óz moınyna alyp, olar AQSh-tyń Hormozgan jáne Mahshahr provıntsııalaryndaǵy jaǵalaýdaǵy bazalar men azamattyq nysandarǵa jasaǵan áýe shabýyldaryna jaýap retinde Kýveıt pen Bahreındegi amerıkalyq áskerı nysandarǵa baǵyttalǵanyn málimdedi.
NATO sammıti aıasynda 8 shildede jýrnalısterdiń suraǵyna jaýap bergen AQSh prezıdenti Donald Tramp Iranmen aradaǵy bitim men áskerı is-qımyldy toqtatý týraly memorandýmnyń endi kúshinde emes ekenin aıtty.
– Menińshe, onyń bári aıaqtaldy. Olarmen endi eshqandaı baılanys jasaǵym kelmeıdi, – dedi Tramp.
Ol Iran ókilderimen kez kelgen baılanysty ýaqyt joǵaltý dep baǵalady. Sonymen birge AQSh prezıdenti kelissóz júrgizýshileri qalasa, Iranmen dıalogty jalǵastyrýyna kedergi keltirmeıtinin málimdedi.
Eske sala ketsek, keshe AQSh Iran munaıyn satýǵa berilgen ýaqytsha ruqsatty qaıtaryp alǵanyn jazdyq.
