AQSh áskeri Iran aýmaǵyna soqqy jasalǵanyn málimdedi
ASTANA. KAZINFORM – AQSh Qarýly kúshteriniń Ortalyq qolbasshylyǵy halyqaralyq sýlarda saýda kemelerine jasalǵan shabýyldarǵa jaýap retinde Irandaǵy nysandarǵa aýqymdy soqqylar jasaı bastaǵanyn málimdedi, dep habarlaıdy VVS.
Ortalyq qolbasshylyqtyń habarlaýynsha, AQSh-tyń áskerı operatsııasy Ormýz buǵazy arqyly ótken úsh saýda kemesine jasalǵan shabýyldarǵa jaýap retinde júrgizilip jatyr.
– Irannyń bul áreketi eshqandaı negizsiz, qaýipti boldy jáne atysty toqtatý rejımin óreskel buzdy, – delingen X áleýmettik jelisinde jarııalanǵan málimdemede.
Seısenbi kúni Ormýz buǵazynda eki munaı-gaz tankerine shabýyl jasaldy.
Katar Irandy gaz tasymaldaýshy tankerge shabýyl jasady dep aıyptady. Keme ushqyshsyz ushý apparatynyń shabýylyna ushyrap, mashına bóliminde órt shyqqan. Ekıpaj músheleri evakýatsııalandy. Reuters agenttiginiń derekkózderi órttiń jarylys qaýpin týdyrǵanyn habarlady.
Teńiz qaýipsizdigi salasyndaǵy derekkózderdiń málimetinshe, Oman jaǵalaýynda Saýd Arabııasynyń týy astynda júzgen taǵy bir gaz tasymaldaýshy tanker zaqymdanǵan. Al Tegeran bul shabýyldarǵa qatysy baryn málimdegen joq.
AQSh pen Iran arasyndaǵy soǵys maýsym aıynda qol jetkizilgen ýaqytsha beıbit kelisim aıasynda toqtatylǵan bolatyn. Bul kelisim túpkilikti mámile jasaý jónindegi kelissózderge 60 kún ýaqyt berýdi kózdeıdi.
Ótken aptada Katarda ótken janama kelissózder beıbit retteý baǵytynda, sonyń ishinde Ormýz buǵazy máselesi boıynsha, aıtarlyqtaı nátıje bermeı aıaqtaldy.
AQSh prezıdenti Donald Tramp birneshe ret aýqymdy áskerı qımyldardy qaıta bastaý qaýpin aıtqan. Sońǵy ret ol bul týraly dúısenbi kúni jýrnalısterge málimdedi.
Buǵan jaýap retinde Irannyń syrtqy ister mınıstri Abbas Arakchı ýaqytsha atysty toqtatý týraly memorandým talaptaryna sáıkes, qaýip-qater saqtalǵan jaǵdaıda túpkilikti kelisim jónindegi kelissózder bastalmaıtynyn aıtty.
Eske sala ketsek, buǵan deıin AQSh Iran munaıyn satýǵa berilgen ýaqytsha ruqsatty qaıtaryp alǵanyn jazdyq.
