AQSh áskeri Irak pen Sırııadaǵy 85 nysanǵa áýeden soqqy jasady
AQSh. KAZINFORM - AQSh áskeri Iordanııadaǵy AQSh áskerlerine ushqyshsyz ushaqpen shabýyl jasaǵannan keıin Irak pen Sırııadaǵy Iran qoldaıtyn nysandarǵa soqqy jasady.
Bul Taıaý Shyǵysta Iordanııada Iran qoldaıtyn sodyrlardyń ushqyshsyz ushaq shabýylynan qaza tapqan úsh amerıkalyq sarbazdyń qazasyna jaýap retinde bastalǵan.
«Saǵat 16.00-de (Astana ýaqytymen saǵat 3-te) AQSh Ortalyq qolbasshylyǵy (CENTCOM) kúshteri Irak pen Sırııadaǵy «Kýds» kúshteri men onymen baılanysty qarýly toptarǵa qarsy áýe shabýyldaryn jasady», - delingen AQSh Ortalyq qolbasshylyǵynyń (CENTCOM) málimdemesinde.
Málimdemege sáıkes, AQSh kúshteri 85-ten astam nysanaǵa soqqy berdi. Bul rette kóptegen ushaq, sonyń ishinde alys qashyqtyqtaǵy bombalaýshy ushaqtar AQSh-tan ushyp keldi. Áýe soqqysy úshin 25-ten astam dáldikpen basqarylatyn oq-dári qoldanyldy.
Soqqyǵa ushyraǵan nysandar arasynda komandovanıeniń jedel ortalyqtary, basqarý ortalyqtary, barlaý ortalyqtary, zymyrandar men snarıadtar, ushqyshsyz avıatsııa qoımalary, sondaı-aq AQSh pen koalıtsııa kúshterine shabýyl jasaýǵa septigin tıgizgen sarbazdar jáne IRQK logıstıkalyq nysandary men oq-dárilerdi jetkizý jelileri boldy.
AQSh prezıdenti Djo Baıdenniń aıtýynsha, AQSh-tyń Iran qoldaıtyn jasaqtardyń áreketine jaýap berýi «búginnen bastalǵan», jáne ol «kez kelgen jerde» jalǵasady.
«AQSh Taıaý Shyǵysta nemese álemniń kez kelgen jerinde qaqtyǵysqa umtylmaıdy. Biraq bizge zııan tıgizgisi keletin kez kelgen adam mynany bilsin: eger siz amerıkalyqqa zııan keltirseńiz, biz jaýap beremiz», - dep keltirdi AQSh prezıdentiniń sózin Aq úı.
Irak áskeri jaýap retinde AQSh-tyń áýe shabýyldary Iraktyń shekaralyq aımaqtaryn nysanaǵa alǵanyn jáne bul shabýyldar aımaqta turaqsyzdyq týdyrýy múmkin ekenin eskertti.
«Bul áýe shabýyldary – Irak egemendigin buzý, Irak úkimetiniń kúsh-jigerine nuqsan keltiredi jáne Irak pen aımaq úshin aýyr zardaptarǵa ákelýi múmkin qaýip tóndiredi», - dedi Irak armııasynyń ókili ıAhıa Rasýl.
