AQSh arzan AITV vaktsınasyn maquldady
ASTANA. KAZINFORM — AQSh Azyq-túlik jáne dári-dármek basqarmasy (FDA) AITV-nyń aldyn alatyn vaktsınanyń patenttelmegen nusqasyn maquldady, dep habarlaıdy Kazinform agenttiginiń menshikti tilshisi ABC News-ke silteme jasap.
Bul sheshim «lenakapavır» (lenacapavir) preparatyn tómen baǵamen satý, osy arqyly halqynyń tabysy az jáne ortasha 120 elge taralýyn jedeldetý jolyndaǵy mańyzdy qadam.
Dári-dármektiń bir adamǵa shaqqandaǵy jyldyq baǵasy shamamen 40 dollar bolady dep kútiledi. Kúndelikti profılaktıkalyq tabletkalardan aıyrmashylyǵy, «lenakapavır» áldeqaıda uzaq aralyqpen egiledi. Eki zertteý júrgizilip, preparat sonyń ekeýinde de táýekel toptarynda ınfektsııa juqtyrýdyń derlik tolyqtaı aldyn alǵan.
Taǵy bir mańyzdy artyqshylyǵy qoldanýdyń qarapaıymdylyǵy bolyp otyr. Unitaid kompanııasynyń AITV-ǵa qarsy kúres bóliminiń basshysy Karmen Peres Kasastyń aıtýynsha, adamdar kúndelikti dári-dármek rejımin árqashan ustana bermeıdi, sondyqtan tabletkalardyń vırýstyń aldyn alýdaǵy tıimdiligi tómen. Lenakapavır bul jaǵdaıdy aıtarlyqtaı jaqsartýy múmkin.
Clinton Health Access Initiative qoljetimdi preparattyń búkil álemde oǵan muqtaj 20 mıllıonǵa jýyq adam úshin demeý bolatynyn aıtady. Sarapshylar bul AITV epıdemııasymen kúreste mańyzdy qadam bolýy múmkin dep sanaıdy. Dúnıejúzilik densaýlyq saqtaý uıymynyń málimetteri boıynsha, ótken jyly álemde shamamen 41 mıllıon adam AITV juqtyrǵan, al 570 000 adam AITV-ǵa baılanysty sebepterden qaıtys bolǵan.
Gilead halqynyń tabysy tómen jáne ortasha eldergi «lenakapavır» jetkizgen jalǵyz kompanııa boldy. Byltyr Gilead óndiristi qamtamasyz etý úshin preparat óndiretin alty kompanııamen óteýsiz lıtsenzııa negizinde kelisim jasasty. Bul lıtsenzııalar Sahara, ońtústik Afrıka, Azııa jáne Latyn Amerıkasyndaǵy birneshe elge taratylady.
Sarapshylardyń baǵalaýy boıynsha, preparat osy elderge alǵash ret birneshe apta ishinde jetkizile bastaıdy. Al qosymsha tirkeý qajet etiletin elderde preparattyń satylymǵa shyǵarylýy uzaq ýaqyt alýy múmkin.
Patentsiz lenakapavır AQSh-ta satylmaıdy. Sebebi Gilead Sciences kompanııasynyń basqa Yeztugo preparaty patenttelgen bolatyn. Saqtandyrý polısi joqtar úshin, bul preparattyń bólshek saýdadaǵy baǵasy jylyna 28 218 dollarǵa deıin jetedi.
Byltyr jazda Eýropa Odaǵy AITV-ǵa qarsy jańa vaktsınany qoldanýǵa ruqsat bergen edi.
Danııada anadan balaǵa AITV men sıfılıs juǵýy tolyq toqtatyldy.
