AQSh armııasynyń jaýyngerleri Aýǵanstanda meshit ımamyn qatelesip atyp óltirdi - Associated Press
ASTANA. Qańtardyń 29-y. QazAqparat - AQSh armııasynyń jaýyngerleri Aýǵanstanda jergilikti meshitterdiń biriniń ımamyn qatelesip atyp óltirdi.
Oqıǵa NATO kúshteriniń Kabýl mańynda ornalasqan Camp Phoenix áskerı bazasyna jaqyn jerde oryn aldy, dep habarlaıdy Associated Press agenttigi.
Ulymen birge ketip bara jatqan 36 jastaǵy ımam Mohammed Júnistiń mashınasyna, ımam tas jolǵa shyǵyp, áskerı patrýlge jaqyndaǵan kezde oq jaýdyrylǵan. Imamǵa tórt oq tıip, ol aýrýhanaǵa bara jatqan jolda kóz jumdy. Imamnyń artynda eki jesiri men 10 balasy qaldy.
Kýágerlerdiń aıtýynsha, amerıkandyq jaýyngerler eskertý jasamastan, birden dáldep oq ata bastaǵan.
NATO-nyń resmı ókilderiniń aıtýynsha, qaza bolǵannyń otbasyna járdemaqy tólenetin bolady.
Áskerıler sondaı-aq, Camp Phoenix bazasynyń tóńireginde jankeshtilerdiń áskerı patrýlderge qarsy shabýyldary jıi bolyp turatynyn aıtyp, aqtalýda.
